Kniha «Pobač» Nasty Kudasavaj i Śviatłany Dziemidovič atrymała litaraturnuju premiju «Hliniany Viales»
«Hliniany Viales» — štohadovaja litaraturnaja premija, jakaja ŭručajecca z 1993 hoda. Łaŭreat atrymlivaje simvaličnuju ŭznaharodu — hliniany stod apiekuna mastactva.
20.05.2023 / 13:53
Uznaharodu «Hliniany Viales», zasnavanuju siabrami Tavarystva volnych litarataraŭ, atrymała hrafičnaja kniha «Pobač» Nasty Kudasavaj (vieršy) i Śviatłany Dziemidovič (ilustracyi), paviedamlaje Reform.by.
«Pobač» — pieršaja kniha novaha biełaruskaha imprynta Skarynyčy ŭ Polščy. Heta ilustravany zbor vieršaŭ, jaki raspaviadaje pra adzinotu i nadzieju, pra pošuk siabie i radzimy ŭ šalonych varunkach rečaisnaści, pryčym ilustracyi da hetaha vydańnia źjaŭlajucca na kožnyj staroncy i ŭjaŭlajuć saboj paralelny hrafičny apovied.
Paetka Nasta Kudasava napisała ŭ sacsietkach, što niekatoryja ludzi zaŭvažyli, što premija pryznačajecca za knihi, vydadzienyja ŭ 2022 hodzie, a hod vychadu «Pobač» paznačany 2023-m.
Adnak pieršaja prezientacyja knihi prajšła ŭvosień 2022 hodzie na knižnaj vystavie ŭ Varšavie, tady było nadrukavana niekalki asobnikaŭ, kab zajavić ab tym, što kniha ździejśniłasia i pakazać jaje čytaču. «Za astatni nakład daviałosia pazmahacca, jon tak i nie zmoh pabačyć śviet u Biełarusi, i ŭrešcie kniha da-vyjšła ŭ Polščy, užo ŭviesnu 2023 h., dziakujučy Skarynyčy, — tłumačyć paetka, — tamu na asobnikach, jakija vy budziecie nabyvać zaraz, staić hod vydańnia 2023.
Što ž… Heta dla mianie śviedčyć tolki ab tym, što my žyviom u składany čas — i dla vydaŭcoŭ, i dla piśmieńnikaŭ, i dla čytačoŭ. Tamu ŭsio idzie trochu błytana, nie tak, jak my pryvykli. Ale hałoŭnaje, kab naša litaratura vyžyła i my razam ź joju jak narod. A ŭžo z premijami jak-niebudź damo rady».
Knihu pa-raniejšamu možna zamović u Varšavie (z dastaŭkaj pa Polščy i ŭsim śviecie) praz telehram @NataZh05.
26 maja na mižnarodnaj knižnaj vystavie ŭ Varšavie a 17 hadzinie adbudziecca aŭtohraf-siesija.
U Biełarusi knihu možna nabyć u Minsku u HC «Kupałaŭski» pad Kastryčnickaj płoščaj, ralety 41-42 (stancyi mietro Kupałaŭskaja i Kastryčnickaja) abo zamović u internet-kniharni z dastaŭkaj pa Biełarusi.
U hetym hodzie šort-list litaraturnaj premii «Hliniany Viales-2022» vyhladaŭ nastupnym čynam:
- Źmicier Bartosik. Zabić upałminzaha. «Bibłijateka Svabody»
- Maksim Znak. Zekameron. «Biełaruskaja turemnaja litaratura». Pravaabarončy centr «Viasna»
- Nasta Kudasava. Śviatłana Dziemidovič. Pobač. «Cymbieraŭ»
- Siarhiej Leskieć. Šept. Vydavieckaja kamanda «Vilma»
- Antanina Chatenka. Vierbnica. «Knihazbor»
- Jula Cimafiejeva. Voŭčyja jahady. «Viasna»
«Hliniany Viales» — štohadovaja litaraturnaja premija, jakaja ŭručajecca z 1993 hoda. Łaŭreat atrymlivaje simvaličnuju ŭznaharodu — hliniany stod apiekuna mastactva.
Stać łaŭreatam premii možna tolki adnojčy.
Łaŭreatam litaraturnaj premii «Hliniany Viales» za 2021 hod byŭ pryznany haradzienski prazaik Viktar Sazonaŭ za raman «Hienietyčny ałfavit», vydadzieny prahramnaj radaj tydniovika «Niva» (Biełastok).
Čytajcie taksama:
Nasta Kudasava. Pahavorym, zapalim u sercach na mih lichtary. Vierš