Апрацоўку Мінска ад кляшчоў завершаць на наступным тыдні
Цэнтр прафілактычнай дэзінсекцыі праводзіць апрацоўку гарадскіх тэрыторый і завершыць яе плануюць да канца наступнага тыдня. Пра гэта паведаміў намеснік галоўнага доктара Мінскага гарадскога цэнтра гігіены і эпідэміялогіі Рыгор Гецюк, пішуць Мінск-навіны.
13.05.2023 / 15:15
Клешч. Фота: Wikimedia Commons
Ён удакладніў, што такія мерапрыемствы выконваюцца на тэрыторыях, дзе ў працэсе абследавання выяўлена перавышэнне дапушчальных паказчыкаў колькасці кляшчоў.
Па стане на 10 мая перавышэнне колькасці адзначана на 16 гарадскіх тэрыторыях Мінска (лес Цнянскага вадасховішча, вуліца Мірашнічэнкі, Парк камянёў, Яблыневы сад і прылеглая да яго тэрыторыя па вул. Лосіка-Семянякі, паркі «Цівалі», Антонаўскі, Грэкавай, экасцежкі «Мядзвежына» і «Горад птушак» і інш.) і 6 пляжах Заслаўскага вадасховішча.
Санітарныя дактары нагадваюць, што асноўнай мерай выратавання ад прысмоктвання кляшча з'яўляецца індывідуальная абарона. У якасці мер асабістай прафілактыкі рэкамендуюцца: адпаведная экіпіроўка пры наведванні зялёнай зоны, якая прадухіляе запаўзанне кляшча; выкарыстанне спецыяльных сродкаў для адпужвання і / або знішчэння кляшчоў (рэпелентныя або акарыцыдна-рэпелентныя сродкі); правядзенне сама – і ўзаемааглядаў.
Выдаленне павукападобных праводзяць ва ўстанове аховы здароўя або самастойна пры немагчымасці аператыўнага звароту да медыкаў. Галоўнае — зрабіць гэта правільна. Рэкамендуецца выкарыстоўваць пятлю з ніткі, звычайны тонкі пінцэт або спецыяльныя прылады для здабывання кляшча. Варта захапіць ротавы апарат за хабаток як мага бліжэй да скуры, але не цягнуць кляшча за брушка. Пасля выдалення месца ўкусу неабходна апрацаваць антысептыкам.
Чытайце таксама:
Кляшчы: як ад іх уратавацца і што рабіць, калі не здолелі
Якія сродкі ад кляшчоў самыя надзейныя? Параўноўвае навуковец