Васкрасенскі распавёў, як сустракаўся з Пачобутам дзеля яго вызвалення
Юрый Васкрасенскі ў інтэрвʼю праграме «Панарама» расказаў, як па ініцыятыве польскіх дыпламатаў арганізаваў сустрэчу з палітвязнем, актывістам польскай меншасці ў Беларусі Андрэем Пачобутам. Гэта адбылося «прыкладна паўтара года таму». Верагодна, перамовы ішлі пра ўмовы вызвалення і перадачу Пачобута ў Польшчу.
04.04.2023 / 08:37
Андрэй Пачобут. Фота: БелТА
«Па просьбе польскага боку я звярнуўся да следчых органаў, і яны ласкава дазволілі сустрэцца з Пачобутам утрох: Пачобут, польскі пасол і я. Гэта сустрэча адбылася ў Следчым камітэце прыкладна паўтара года таму з мэтай нармалізацыі адносін, спынення эскалацыі», — кажа Васкрасенскі.
Але, паводле яго, сустрэча не стала для Васкрасенскага прыемнай. Пачобут не быў спагадлівым з былым членам штаба Бабарыкі.
«Ён паспрабаваў накінуцца на мяне, і атрымаў адпаведны адпор», — узгадвае Васкрасенскі, якому было, відаць, не салодка.
«Для мяне да гэтага часу часу загадка, чаму ён так паводзіў сябе. <…> Я падумаў: можа ён і ў Польшчу не жадае вяртацца», — сказаў Васкрасенскі, які сам пасля арышту пайшоў на супрацу са спецслужбамі і стаў ухваляць дзеянні ўладаў.
У 2021 годзе Беларусь вызваліла трох актывістак польскай меншасці. Гэта Ганна Панішава, Марыя Цішкоўская і Ірэна Бярнацкая. Яны былі высланыя з Беларусі ў Польшчу.
У сакавіку 2022 года кіраўніка незарэгістраванага Саюза палякаў Беларусі Анжаліку Борыс вызвалілі з-пад варты і перавялі пад хатні арышт.
9 лютага на 8 гадоў калоніі асудзілі журналіста Андрэя Пачобута.
Польшча не пакідае спробаў вызваліць яго. «Калі Андрэй Пачобут заўтра будзе вызвалены, паслязаўтра будзе адкрыты праход у Баброўніках», — сказаў міністр унутраных спраў і адміністрацыі Польшчы Марыюш Камінскі.
Чытайце таксама:
Польшча дамаглася вызвалення больш за 10 палітвязняў у Беларусі — прадстаўнік МЗС
Лукашэнка адказаў, на каго гатовы абмяняць палітвязня Пачобута