«Паспытайце і далей глядзіце». У чым цымус мінскага фермерскага рынку «Усё сваё»?
Толькі па суботах з 11-й да 15-й гадзіны па адрасе Кульман 1/2 можна паспрабаваць і купіць фермерскія прадукты ў Мінску. У трох намётах і ўсталяваных на вуліцы сталах можна знайсці калі не ўсё, то многае. Пачынаючы са свежага хлеба і заканчваючы хамонам і крафтавымі соусамі. Карэспандэнт Blizko.by схадзіў на суботні рынак і паглядзеў, колькі што там каштуе, а таксама пагаварыў з пастаянным наведвальнікам рынку.
28.03.2023 / 21:25
Частыя наведнікі рынку ведаюць, што чым раней ты на яго прыйдзеш, тым большы выбар у цябе будзе. Але журналісты тут упершыню і прыйшлі не а 11-й, а бліжэй да гадзіны, таму фразы «вы забіраеце апошняе» ці «ў нас ужо не засталося» прыйшлося ім чуць неаднойчы.
Тым не менш, людзей было шмат. Напрыклад, каб зайсці ў адзін з намётаў, трэба было пачакаць, пакуль адтуль выйдуць некалькі чалавек.
Усярэдзіне вялікая плынь людзей раз-пораз перасоўвалася ад адных прадаўцоў да іншых.
Сам намёт адносна невялікі па памеры і не нагадвае рынак у звыклым разуменні: цёплыя адценні ствараюць утульную атмасферу, у якой прадаўцы з усмешкай прапануюць паспрабаваць свае прадукты і распавядаюць пра іх выраб.
Ад суботы да суботы асартымент можа мяняцца, але 25 сакавіка супольнасць фермераў і энтузіястаў — менавіта так заснавальнік праекта Ксенія Вяцкая называе «Усё сваё» — прадавала свежы хлеб, сала, каўбасы, птушку, сыры і малочную прадукцыю, прысмакі і выпечку, сыраціснутае масла, агуркі і салаты, мёд і мядовыя прадукты, крафтавыя соусы, мікразеляніну, квасы і медавухі, цэпеліны, клёцкі і бліны, таматны сок, хамон, зеляніну, травяныя гарбаты, скрыпень і каву мясцовага пражання.
У кожнага прадаўца на стале можна ўбачыць асобную талерку, дошчачку з тым ці іншым прадуктам або шкляначку, напрыклад, з квасам, медавухай. Гэта зроблена для таго, каб кожны наведвальнік рынку мог спачатку паспрабаваць прапанаваную прадукцыю і толькі пасля гэтага прымаць рашэнне, ці варта яе купляць.
У рэчаіснасці ж было складаней адмовіцца ад дэгустацыі, чым прыняць рашэнне аб куплі. Варта было толькі паглядзець на чызкейк, як прадавец у тую ж хвіліну прапанаваў яго паспытаць.
— Не, дзякуй, мы пакуль што глядзім.
— Дык вы паспытайце і далей глядзіце, — адказвае нам прадавец.
Гэты рынак, хутчэй за ўсё, больш спадабаецца тым, хто хоча купляць выключна натуральныя прадукты з умоўна чыстым складам і гатовы за іх плаціць больш, чым звычайна. А людзям, якія прывыклі выбіраць прадукты ў найбліжэйшым да дому супермаркеце, магчыма, цэны здадуцца занадта высокімі.
Часты наведвальнік «Усё сваё» расказаў, чым яго прыцягвае фермерскі рынак:
«Я прыязджаю сюды прыкладна раз-два на месяц, а мая жонка не прапускае амаль ніводнай суботы, — распавёў Яўген. — Па-першае, мне падабаюцца якасныя і свежыя прадукты людзей, якія на гэтым зарабляюць.
Па-другое, я хачу падтрымліваць беларускі прадукт. Для таго каб было нешта новае, якаснае, смачнае, патрэбна падтрымка, як сродкамі, так і словамі.
Па-трэцяе, я люблю шчырасць фермераў. Часцей за ўсё мы з жонкай купляем фермерскія яйкі, сезонныя памідоры з Піншчыны, хлеб з Old School Bakery, мёд і арэхі са згушчонкай у Наталлі, часам бярэм сальцісон. Як правіла, у нас сярэдні чэк вагаецца ад 15 да 50 рублёў.
Але мне не падабаецца, што гэта месца не заўсёды можа справіцца з той колькасцю людзей, якія наведваюць яго ў прызначаныя гадзіны з 11:00 да 15:00».
Чытайце таксама:
Пайшлі бярозавік і кляновік. Расказваем, дзе і пачым іх прадаюць лясгасы
«Колькі каштуе? Ну, колькі дасце». Якія прысмакі можна купіць «па дарозе»?
Сала — сапраўдны суперфуд. У чым карысць гэтага прадукту і колькі ён цяпер каштуе