«Heta ŭsio niapraŭda! Heta napakaz!» Niejkaja žančyna vyhuknuła hetyja słovy padčas načnoj sustrečy Pucina z maryupalcami
Na videa nibyta vypadkovaj sustrečy Pucina z žycharami Maryupala chtości ź ludziej na fonie vyhuknuŭ zdalok słovy «Heta ŭsio niapraŭda! Heta napakaz!». Achoŭniki pačali rabić znaki adzin adnamu. Hety varyjant videa znajšli na telehram-kanale RIA Novosti.
20.03.2023 / 08:34
Što mieła na ŭvazie žančyna, nieviadoma, jak nieviadoma, ci mieła jana infarmacyju, što za hość zavitaŭ nočču ŭ ich dvor.
Maryupal — niekali adzin z samych sučasnych i pryhožych haradoŭ Ukrainy, ciapier całkam razburany. Adbudavanyja tolki niekalki kvartałaŭ.
Daradca mera Maryupalu Piotr Andruščanka ŭ intervju Bi-bi-si raspavioŭ, što novych damoŭ, jakija pakazvali Pucinu, — tolki adzin rajon, jaki adbudavany Ministerstvam abarony. «Heta ŭsiaho piać-siem budynkaŭ. Jon chacieŭ pakazać, jak Rasija dapamahła adbudavać Maryupal znoŭku, ale heta niapraŭda».
Andruščanka ličyć, što ŭ Rasii nie chopić hrošaj, kab pieratvaryć Maryupal u kvitniejučy horad i demanstravać hetuju pryhožuju karcinku jak pośpiech «śpiecapieracyi». A prama ciapier realnaść Maryupala žudasnaja, dadaŭ jon, abapirajučysia na apaviadańni znajomych i siabroŭ, jakija zastajucca tam: ludzi nie žyvuć, a vyžyvajuć.
Navat u hetyja novyja damy ludzi nie mohuć zajechać, bo ŭ ich niama hrošaj kupić meblu ŭ pustyja kvatery, jakija zdajuć budaŭniki.
Što tyčycca ludziej, jakija vitali Pucina na videa, Andruščanka skazaŭ, što ščyryja prychilniki Pucina ŭ Maryupali jość: «My razumiejem, što kala 10% ludziej, jakija zastajucca ŭ Maryupali ciapier, u ich absalutna prarasiejskija pohlady. Ale jany — nie bolšaść žycharoŭ Maryupala».