U prajekt z biełaruskimi karaniami Soula inviestavali madeli Natałla Vadzianava i Kaciaryna Damańkova
AI-prahrama dla ciažarnych i baćkoŭ Soula atrymała inviestycyi ad madeli Natałli Vadzianavaj. Pra heta na svajoj staroncy ŭ fejsbuku paviedamiła jaje CEO i zasnavalnica Natałla Mirančuk. Suma inviestycyj nie raskryvajecca.
14.03.2023 / 12:03
Usie fota: natallia.miranchuk / Facebook
Mabilnaja prahrama Soula stvoranaja na asnovie štučnaha intelektu dla dapamohi ciažarnym žančynam i baćkam. Jana daje žančynam piersanalizavanuju infarmacyju ab ciažarnaści, rodach i paślarodavym pieryjadzie. U prahramie taksama jość čat-bot i bibłijateka kantentu, piša dev.by.
Prajekt byŭ prezientavany na kanfierencyi ŭ Dubai. Vadzianava prylacieła tudy padtrymać prajekt. «Ciapier u nas šmat prapanoŭ ab dapamozie, partniorstvie i inviestycyjach. A značyć, my zmožam pracavać z najlepšymi ekśpiertami i śpiecyjalistami ŭ svaich halinach», — napisała zasnavalnica Natałla Mirančuk.
Adnym z pieršych inviestaraŭ prajektu jana nazvała biełaruskuju madel Kaciarynu Damańkovu.
Soula — nie pieršy prajekt u biełaruskimi karaniami, u jaki inviestavała Natałla Vadzianava.
U 2017 hodzie jana razam z partniorami inviestavała 5 miljonaŭ dołaraŭ u prahramu dla žanočaha zdaroŭja Flo.
U 2020 hodzie Vadzianava stała inviestaram Loona — prahrama dla lohkaha zasynańnia, jakuju prydumała kamanda raspracoŭščykaŭ MSQRD.
U 2021 hodzie Vadzianava razam z biźnies-partnioram Cimonam Afinskim ukłała 300 tysiač dalaraŭ u rasijska-biełaruski prajekt Zenia Yoga — raspracoŭščyka prahramy dla zaniatkaŭ johaj.