«Idealny štorm». Na praciahu apošnich dzion adbyvajecca rekordnaje padzieńnie akcyj i indeksaŭ bankaŭ ZŠA. U niekatorych vypadkach źnižeńnie dachodziła amal da -90%
Raskazvajem, što stała pryčynaj maštabnaha krachu i jakija mohuć być nastupstvy.
14.03.2023 / 09:52
13 sakavika ŭ paniadziełak adbyŭsia vielmi bujny abvał akcyj i indeksaŭ šmatlikich rehijanalnych i bujnych bankaŭ ZŠA. Pra heta napisała ahienctva Bloomberg i inšyja suśvietnych SMI.
Padzieńnie było vyklikana tym, što adzin z najbujniejšych i ŭstojlivych amierykanskich bankaŭ SVB jašče 10 sakavika abviaściŭ ab bankructvie, što vyklikała paniku ŭ jaho kłijentaŭ, inviestaraŭ i trymalnikaŭ akcyj.
Jak tady adznačyŭ The New York Times, heta było druhoje pa vieličyni bankructva banka za ŭsiu historyju ZŠA i najbujniejšaje z momantu finansavaha kryzisu 2008 hoda.
Heta ŭ svaju čarhu spravakavała zakryćcio jašče dvuch inšych bujnych amierykanskich bankaŭ Silvergate Capital Corp. i Signature Bank, jakija byli ciesna ŭzajemaźviazany z bankam SVB i mieli takuju ž vialikuju kolkaść niezastrachavanych aktyvaŭ na sotni miljardaŭ dalaraŭ u sukupnaści.
Usio heta tolki pahoršyła situacyju i ŭzmacniła paniku na finansavych rynkach, bo ludzi stali masava zdymać svaje ŭkłady i raspradavać akcyi, sprabujučy zachavać svaje źbieražeńni. Padobna «efiektu damino» heta zakranuła mnostva inšych bankaŭ u ZŠA i za ich miežami.
Maštab abvału
Pa infarmacyi Bloomberg, abvał zakranuŭ dziasiatki, kali nie sotni rehijanalnych i bujnych bankaŭ ZŠA. Naprykład:
-
First Republic Bank straciŭ rekordnyja 79% padčas učorašnich tarhoŭ.
-
Western Alliance Bancorp za adzin dzień abvaliŭsia na biesprecedentnyja 85%.
-
PacWest Bancorp źniziŭsia na 60%, taksama dasiahnuŭšy antyrekordu.
Z-za hetaha mnohija banki ŭčora ekstrana prypynili tarhi, kab paźbiehnuć jašče bolšaha krachu.
Situacyja z akcyjami tolki nievialikaj častki bankaŭ ZŠA, dzie bačna, što bujnoje padzieńnie adbyvajecca navat paśla zakryćcia tarhoŭ. Krynica: investing.com
Pry hetym navat samyja ŭstojlivyja amierykanskija «bankaŭskija hihanty», jak, naprykład, Bank of America i Credit Suisse za dzień stracili 7 i 9 adsotkaŭ adpaviedna.
U toj ža čas nazirajecca masavy prytok kapitału ŭ takija instrumienty, jak bitkoin, zołata i akcyi dziaržaŭnych kampanij, što havoryć ab žadańni inviestaraŭ «pieračakać buru» i zachavać svaje hrošy. Pra heta taksama śviedčyć najbujniejšaje z 2008 hoda padzieńnie dachodaŭ kaznačejskich ablihacyj ZŠA, zaŭvažyŭ The Daily Shot.
Ułady ZŠA pry hetym imknucca praduchilić dalejšy abvał rynkaŭ: prezident ZŠA Džozef Bajden 13 sakavika zajaviŭ, što bankaŭskaja sistema vystaić, a padatkapłacielščyki, u adroźnieńnie ad inviestaraŭ i kredytoraŭ, nie paniasuć straty. Taksama jon paabiacaŭ pakarać vinavatych u krachu SVB, adnak nie staŭ ničoha kazać ab vyratavańni samoha banka, paviedamiła ahienctva Reuters.
Adnak paśla vystupu Bajdena akcyi bankaŭ praciahnuli padać. Toje ž, pa infarmacyi Euronews, adbyłosia i z bankami ŭ Jeŭropie.
Pryčyna i nastupstvy kryzisu
Jak stała viadoma, adnoj z asnoŭnych pryčyn finansavaha krachu banka SVP, jaki i spravakavaŭ dalejšy kryzis, stała rehularnaje pavieličeńnie pracentnaj staŭki Fiederalnaj reziervovaj sistemy ZŠA i padvyšanaja inflacyja.
«Bank zrabiŭ zvyčajnuju praceduru — ukłaŭ srodki kłijentaŭ u kaznačejskija ablihacyi ZŠA, jakija z-za faktaraŭ inflacyi i vysokaj pracentnaj staŭki pryviali da mocnych strat zamiest dachodaŭ. U vyniku źjaviłasia surjoznaja zapazyčanaść pierad kłijentami, a sami jany stali chutka zabirać z banka svaje hrošy», — napisała vydańnie Business Insider.
Najhoršymi scenarami i nastupstvami ciapierašniaha abvału (jaki ŭ Deutche Bank užo nazvali «idealnym štormam») mohuć stać:
- Abiasceńvańnie dalara, bo ŭlivańnie hrošaj dla vyratavańnia bankaŭ i ich kłijentaŭ mocna pavysić inflacyju ŭ ZŠA, što pavialičyć suśvietnyja ceny na enierhanośbity i pradukty charčavańnia.
- Paŭtareńnie suśvietnaha finansavaha kryzisu 2008 hoda, bo praciah pavieličeńnia abo adsutnaść źnižeńnia pracentnaj staŭki FRS pryviadzie da jašče bolšych bankructvaŭ i začynieńniaŭ finansavych ustanoŭ ZŠA, što mocna adabjecca na anałahičnych ustanovach pa ŭsim śviecie.
Adnak analityki Business Insider adznačajuć, što surjoznych nastupstvaŭ ciapierašniaha kryzisu možna paźbiehnuć, bo najbujniejšyja banki surjozna pakłapacilisia ab svajoj abaronie na vypadak paŭtareńnia 2008 hoda, a takich bankaŭ z vialikimi niezastrachavanymi depazitami, jak SVB, zusim niašmat.
Čytajcie taksama:
U Biełarusi ŭ 2022 hodzie zapuścili tolki 26 novych startapaŭ
Mižnarodnyja reziervovyja aktyvy Biełarusi za miesiac źmienšylisia na $373,3 młn