U mabilnym dadatku BPS-Śbierbanka prybrali biełaruskuju movu
Raniej u mabilnym dadatku biełaruskaja mova była, ale paśla jaho abnaŭleńnia źnikła. U BPS-Śbierbanku raskazali, čamu.
03.03.2023 / 12:33
Fota: Huhł-karta
Bank spasłaŭsia na toje, što ŭ adpaviednaści z zakanadaŭstvam interfiejs i vychadnyja dakumienty pavinny farmiravacca na adnoj z dziaržaŭnych moŭ — biełaruskaj ci ruskaj.
«Zaraz pa rašeńni banka ŭ mabilnym dadatku možna vykarystoŭvać tolki ruskuju movu, mahčymaść vybaru inšaj movy adsutničaje.
Heta rašeńnie zjaŭlajecca pravam banka, nie parušaje dziejnaje zakanadaŭstva Respubliki Biełaruś i abumoŭlena vysokimi vydatkami na padtrymańnie dadatkovych łakalizacyj pry małoj kłijenckaj bazie karystalnikaŭ biełaruskaha moŭnaha pakieta», — adkazali na elektronny zvarot u banku.
BPS-Śbierbank — adzin z najbujniejšych bankaŭ u Biełarusi. Jon uvachodzić u skład mižnarodnaj hrupy Śbierbanka Rasii.
U śniežni 2009 hoda ŭrad Biełarusi i Śbierbank Rasii abjavili ab padpisańni pahadnieńnia ab kupli Śbierbankam Rasii 93,27 pracenta akcyj BPS-Bank. U kastryčniku 2011 hoda bank pierajmienavany ŭ adkrytaje akcyjaniernaje tavarystva «BPS-Śbierbank».