Rasśledavalniki raspaviali, dzie žyvie Pucin z Kabajevaj i jak vyhladaje ich žytło
Pra Pucina apošnim časam vyjšła šmat rasśledavańniaŭ, u jakich žurnalisty raspaviali pra nieabsiažnuju pa pamierach, kolkaści i koštach majomaść prezidenta Rasii, aformlenuju na padstaŭnych asobaŭ. Ale jašče nie było adkazu, dzie žyvie Pucin. Vydańnie «Prajekt» upieršyniu adkazała na heta pytańnie.
28.02.2023 / 17:38
Pucin uznaharodžvaje Kabajevu ordenam «Za zasłuhi pierad Ajčynaj» IV stupieni, 2005 hod. Fota: kremlin.ru
Pavodle rasśledavalnikaŭ, niahledziačy na toje, što Kabajeva zjaŭlajecca ŭładalnicaj samaj vialikaj i darahoj kvatery ŭ Rasii, jakaja znachodzicca ŭ ŽK u Sočy, razam z Pucinym jana žyvie padalej ad čužych vačej — u Naŭharodskaj vobłaści na Vałdai.
«Prajekt» parazmaŭlaŭ nie mienš jak z dziesiaćciu byłymi i dziejnymi čynoŭnikami vysokaha ranhu, i ŭsie jany pryznalisia, što nikoli nie bačyli Pucina i Kabajevu razam nie tolki na publičnych, ale i na zakrytych mierapryjemstvach i sustrečach. Bujny biźnieśmien, jaki nie raz stanaviŭsia śviedkam harnałyžnaha adpačynku Pucina ŭ Sočy, pryznajecca, što i tudy Pucin nikoli nie braŭ svaju spadarožnicu žyćcia. Pry hetym nichto z surazmoŭcaŭ «Prajektu» nie sumniavaŭsia ŭ najaŭnaści suviazi prezidenta i «himnastki».
Žurnalisty znajšli nie tolki miesca žycharstva Pucina i Kabajevaj, ale i interjery ŭlubionaj rezidencyi rasijskaha prezidenta, pabudavanaj u 2000-ch. U 2003 hodzie byŭ hatovy pieršy varyjant rezidencyi, dyzajn byŭ u styli «chaj-tek», i jon nie spadabaŭsia Pucinu. Toj skazaŭ, što choča, kab było «jak u Pieciarburhu».
Pracujučy nad rasśledavańniem, «Prajekt» adšukaŭ adnaho z kiraŭnikoŭ budaŭnictva vałdajskaj rezidencyi Pucina. Jon uzvodziŭ pucinskuju daču da 2005 hoda, kali asnoŭnyja pracy byli skončanyja. Pradstaŭlenyja im fatahrafii byli vieryfikavanyja «Prajektam» — jany dajuć mahčymaść zazirnuć unutr prezidenckaha doma, tamu što interjery adlustroŭvajuć ujaŭleńni ich haspadara ab vydatnym. Tam znoŭ vielmi šmat zołata i kaštoŭnych kamianioŭ.
U 2013 hodzie Pucin aficyjna raźvioŭsia z Ludmiłaj, ale Vałdaj lubić nie pierastaŭ, piša «Prajekt». Mienavita siudy — spačatku, vierahodna, u toj «załaty» dom — jon pryvioŭ novuju vybrańnicu. A paźniej adbudavaŭ dla Kabajevaj i jaje dziaciej novy cieram — užo draŭlany.
Navakołle pucinskaj i kabajeŭskaj rezidencyj na Vałdai — heta zapaviednyja miescy. Bolšaja častka lasoŭ tam achoŭvajecca nie tolki siłami FSA, ale i zakonam — heta terytoryi Vałdajskaha nacyjanalnaha parku. Heta adnak nie pieraškodziła raspačataj u 2018 hodzie vialikaj budoŭli prosta na asabliva achoŭnych ziemlach nacparka — tam dla Pucina i jaho blizkich vyrašyli pabudavać tajemnuju čyhunku.
Za čas pracy karespandenta «Prajektu» na Vałdai adrazu niekalki miascovych žycharoŭ upeŭniena paŭtaryli: Pucin dla padarožžaŭ na voziera ŭ apošnija hady karystajecca indyvidualnym braniravanym ciahnikom, dla čaho na padjeździe da rezidencyi pabudavali sakretnuju achoŭnuju stancyju. Niahledziačy na sakretnaść znajści hetuju stancyju i čyhunačnuju vietku da jaje, jak śćviardžajuć žurnalisty, asablivaj ciažkaści nie skłała.
Na spadarožnikavych zdymkach rasśledavalniki pabačyli, što na terytoryi ŭ 2016-2020 hodach uźviali dziciačuju placoŭku, a taksama trasu dla kartynhu — heta žurnalisty ličać adnym z dokazaŭ prysutnaści dziaciej na terytoryi dačy Pucina.
WSJ u minułym hodzie pisaŭ, što ŭ Kabajevaj i Pucina — troje sumiesnych dziaciej. «Prajekt» infarmacyju pra kolkaść i poł mierkavanych dziaciej Uładzimira Pucina raskryvać nie staŭ, spasłaŭšysia na ich niepaŭnaleccie.