Siłaviki padazrajuć u datyčnaści da padryvu samalota ŭ Mačuliščach uradženca Kryma
Pavodle śviedčańniaŭ z Biełarusi, jakija atrymlivajuć telehram-kanały i SMI, u jakaści padazravanaha ŭ vykanańni ŭčarašniaj dyviersii na aeradromie ŭ Mačuliščach siłavikami razhladajecca niejki Mikałaj Šviec, jaki zjaŭlajecca ŭradžencam Kryma. Prynamsi, jahonaje imia i fota źmiaščajecca na aryjenciroŭkach, jakija rassyłajucca pa roznych arhanizacyjach.
27.02.2023 / 19:02
Spačatku telehram-kanał Nexta paviedamiŭ na padstavie svaich krynic, što aryjenciroŭki na Šviaca Mikałaja Uładzimiraviča 1993 hoda naradžeńnia rassyłajucca pa rajaddziełach MUS i navat pa addziełach MNS.
A adzin z čytačoŭ vydańnia «Zierkało» paviedamiŭ, što aryjenciroŭku pa Mikałaju Šviacu rassyłajuć nie tolki pa siłavych strukturach, ale i pa hramadzianskich ustanovach. Tak, jaje razasłali pa pracoŭnych čatach homielskich aŭtaparkaŭ. Prytym «heta dasyłali nie tolki im, ale i miedykam paviedamlali, i maršrutčykam dziaržaŭnym».
Fota z aryjenciroŭki, razasłanaj pa homielskich aŭtaparkach. Zdymak čytača «Zierkała»
U addziele ŭnutranych spraŭ Homielskaha rajvykankama žurnalistcy «Zierkała», jakaja patelefanavała tudy jak zvyčajnaja hramadzianka, pacvierdzili, što padobnaha čałavieka sapraŭdy šukajuć.
Kiraŭnik Bypol Alaksandr Azaraŭ na pytańnie «Zierkała», ci źviazany hety mužčyna z dyviersijaj u Mačuliščach, adkazaŭ admoŭna:
«Nam heta asoba nie znajomaja. Chto jon taki, ja nie viedaju. U ich zadača — ustanaŭlivać padazravanych, a dzie jany ŭstanavili jaho, nie raskazvajuć, boh jaho viedaje. Vypadkova prachodziŭ pa vulicy, i voś jany jaho padazrajuć».