Don Žuan — sałodkahałosy spakuśnik ci cyničny monstr? Novaje VIDEA na jutub-kanale Andreja Chadanoviča
«Don Žuan» — heta historyja zusim nie pra kachańnie, a chutčej pra ŭładu i ludziej, jakija joj słužać. Vielmi aktualna dla siońniašniaj Biełarusi, ci nie praŭda? Andrej Chadanovič u novym videa raskazvaje pra «Don Žuana» ŭ viersii francuzskaha kamiedyjohrafa Žan-Batysta Maljera.
22.02.2023 / 18:32
Siońnia Andrej Chadanovič raskazvaje:
- kali adbyłosia druhoje naradžeńnie zabitaha Don Žuana;
- jaki vychadziec z Biełarusi napisaŭ svaju viersiju «Don Žuana»;
- čym Maljer padobny da savieckich tvorcaŭ;
- u čym hłyboki fiłasofski sens «Don Žuana» i pry čym tut Biełaruś;
- čutki i lehiendy pra Žan-Batysta Maljera — dzie tut praŭda;
- čamu Don Žuan paraŭnoŭvaŭ siabie z Alaksandram Makiedonskim;
- chto byŭ pratatypam hałoŭnych hierojaŭ pjesy Maljera;
- jak Chadanovič zrabiŭ biełaruski pierakład «Don Žuana» dla Kupałaŭcaŭ i čamu nie ŭsio atrymałasia.
Voś niekalki dumak z videa.
Razmova viadziecca nie stolki pra kachańnie, kolki pra nieabmiežavanuju ŭładu. Don Žuan nievypadkova zhadvaje pra Alaksandra Makiedonskaha ź jaho vajennymi ambicyjami. Jon sam sabie Alaksandr Makiedonski ŭ kachańni. Ci stavicca hieroj z pavahaj da žančyny jak asoby? Pytańnie rytaryčnaje. Zrazumieła, nie. Ci cenić jon žanočuju pryhažość? Nastolki, nakolki moža joj skarystacca!
Vidavočna, Maljer siabie šmat u čym atajasamlivaŭ sa Shanarelem. Jon pracuje z piersanažam u miežach mahčymaściaŭ skazać uładaru: «Ty nie maješ racyi». A Don Žuan nadta nahadvaje Ludovika ChIV, jaki pychliva kazaŭ, što «Dziaržava — heta My», jaki vaładaryŭ stolki hadoŭ, što biełarusu zastajecca tolki da bolu zakusić hubu. Jon pieražyŭ svajho syna i ŭnuka i pakinuŭ tolki małaletniaha praŭnuka paśla siabie. Karol, jaki praviŭ tak, što złyja jazyki žartavali: heta doŭžyłasia stolki, što ŭ kancy ŭsie zabyli toje, što było spačatku. Voś ža, krytykavać takoha možna tolki adzin raz, dalej ciabie pakarajuć. Ale Maljer nie vybiraŭ čas svajho naradžeńnia i ŭmovy, u jakich pisaŭ. Jon karystaŭsia tym aknom mahčymaściaŭ, jakoje jamu dałosia. Maljer pracavaŭ z uładaj, upłyvaŭ na ŭładu i sprabavaŭ jaje vychoŭvać.
Usie, zdajecca, zadavolenyja, što hrešnik pakarany, ale ž Shanarelu nie zapłacili. Varta zadumacca ŭsim tym, chto rukami i zubami trymajecca za ŭładu, niezaležna ad taho, chto jany: čynoŭniki viertykali, ludzi, jakija falsifikujuć vybary, ci siłaviki, jakija paviazanyja kryvioj sa svaimi zamoŭščykami. Pamiatajcie, złačynca budzie pakarany, a vy zastaniaciesia biez płaty ad jaho, ale z raspłataj, jakaja pryjdzie zusim ź inšaha boku.
Historyja Maljera i jaho «Don Žuana» vučyć, što ŭ samyja ciomnyja časy ŭ čałavieka zastajecca terytoryja dla taho, kab stvarać svajo i być saboj, tamu praciahvajem, jak by ni było ciažka, asabliva biełarusam u Biełarusi, raźvivacca kulturna i rabić svoj uniosak u ahulnuju pieramohu.
Hladzim razam novaje videa Andreja Chadanoviča pra Don Žuana, stavim padabajki, kamientujem i dzielimsia z siabrami i siabroŭkami.