Sihnał pra kaniec šantažu mihrantami? Pad Minskam u ahrasiadzibie AMAP zatrymaŭ amal 100 nielehałaŭ
Supracoŭniki addzieła pa hramadzianstvie i mihracyi Minskaha RUUS pry padtrymcy AMAPa ŭ ahrasiadzibie ŭ Michanavičach vyjavili hrupu nielehalnych mihrantaŭ, paviedamlaje pres-słužba MUS.
18.02.2023 / 12:14
Zatrymanyja 94 čałavieki: hramadzianie Ałžyra, Afhanistana, Jehipta, Jemiena, Iraka, Siryi, Maroka i Pakistana. Jany prybyli ŭ našu krainu z Rasii naziemnym transpartam i płanavali pajechać u Zachodniuju Jeŭropu. Biełaruskich viz u ich niama.
54 zamiežniki pryciahnutyja da administracyjnaj adkaznaści, im dadzienaje prava dobraachvotnaha vyjezdu. Siamiora, jakija nie majuć dakumientaŭ, zatrymanyja dla vyśviatleńnia asoby. U dačynieńni da čacviarych razhladajecca pytańnie ab zaviadzieńni kryminalnaj spravy ŭ suviazi z parušeńniem terminu zabarony ŭjezdu ŭ Biełaruś. 27 čałaviek prymusova vydvaranyja z krainy. Dvoje pieradadzienyja ŭ staličny rehijon dla vyśviatleńnia abstavin uchileńnia ad dobraachvotnaha vyjezdu.
Pačynajučy z leta 2021 hoda Biełaruś aktyŭna pryciahvała na svaju terytoryju mihrantaŭ z krain Azii i Afryki i skiroŭvała ich na miežy Polščy, Litvy i Łatvii. Heta supravadžałasia kryklivaj prapahandysckaj kampanijaj. Kulminacyjaj jaje była sproba arhanizavanaha šturmu polskaj miažy ŭ Bruzhach u listapadzie 2021 hoda, jakuju centralizavana aśviatlali łukašenkaŭskija SMI.
Kampanija vyhladała jak šantaž jeŭrapiejskich krain u adkaz na padtrymku ruchu za hramadzianskija pravy ŭ Biełarusi. Paźniej hučali mierkavańni, što hibrydnaja ataka z vykarystańniem nielehalnych mihrantaŭ była ŭzhodnienaj z Maskvoj sprobaj zastrašyć jeŭrapiejskija krainy napiaredadni napadu na Ukrainu i nastroić hramadskuju dumku krain Jeŭrasajuza suprać pryjomu ŭciekačoŭ — chvala jakich čakałasia padčas vajny.
U vyniku suprać łukašenkaŭcaŭ byli ŭviedzienyja novyja sankcyi, a Polšča, Litva i Łatvija ŭmacavali svaje miežy z našaj krainaj. Byŭ taksama zakryty pamiežny pierachod «Bruzhi-Kuźnica».