Žycharu Bresta za administravańnie łakalnaha čata dali čatyry hady kałonii
Brescki abłasny sud u zakrytym režymie 10 lutaha vynies prysud Dźmitryju Ściapanavu, abvinavaciŭšy jaho ŭ stvareńni ekstremisckaha farmavańnia abo ŭdziele ŭ im pavodle č. 1 art. 361-1 Kryminalnaha kodeksa. Spravu razhladaŭ suddzia Andrej Leščanka, piša «Viasna».
11.02.2023 / 13:31
Zhodna z materyjałami spravy, 38-hadovy Dźmitryj Ściapanaŭ u vieraśni 2020 hoda z dapamohaj mabilnaha telefona stvaryŭ telehram-čat, paviedamleńni ŭ jakim u sakaviku 2022 hoda sudom Leninskaha rajona Bresta pryznany ekstremisckimi materyjałami. Zatym Ściapanaŭ, nibyta budučy administrataram hetaha čata pa listapad 2022 hoda, abjadnaŭ hrupu hramadzian i kiravaŭ dziejnaściu hetaj supolnaści, schilajučy ludziej da ekstremisckaj dziejnaści.
Akramia taho, abvinavačany dapuskaŭ i nie spyniaŭ raźmiaščeńnie inšymi karystalnikami Telegram-čata «HOBK» abraz pradstaŭnikoŭ ułady i suddziaŭ, a taksama ekstremisckich materyjałaŭ, u tym liku tych, jakija raspalvajuć sacyjalnuju varožaść i varožaść u dačynieńni da supracoŭnikaŭ pravaachoŭnych orhanaŭ.
Ściapanava jašče da suda źmiaścili pad vartu. Śpiarša mužčynu sudzili pa administracyjnych «palityčnych» artykułach, a potym raspačali kryminalnuju spravu. Pry hetym vielmi padobna na toje, što čat «HOBK» byŭ pryznany «ekstremisckim farmavańniem» užo paśla zatrymańnia Dźmitryja.
Sud pakaraŭ Ściapanava pazbaŭleńniem voli na termin čatyry hady kałonii va ŭmovach ahulnaha režymu.