У Бабруйску начальнік аўташколы браў хабары гарэлкай, каўбасой і курынымі крылцамі
Бабруйскі суд разгледзеў крымінальную справу ў дачыненні да начальніка бабруйскага філіяла КУП «Магілёўскі аўтавучэбны камбінат», якое вучыла ваджэнню і выдавала пасведчанні аб перападрыхтоўцы кіроўцаў на грузавыя катэгорыі. Незвычайнасць справы была ў тым, што часам у якасці хабару, які браў гэты начальнік, фігуравалі розныя прадукты харчавання, паведамляе канал «Бабруйск Online».
10.02.2023 / 20:06
Фота ілюстрацыйнае
Сярод атрыманых хабараў, якія трапілі на схаваную камеру відэаназірання, трапіў наступны прэйскурант на атрыманне правоў:
- пачак курыных крылцаў, маянэз, каўбаса вараная, хлеб, напой, бутэлька гарэлкі (усяго на 17 руб. 18 кап.);
- бутэлька гарэлкі, сок, колца каўбасы (19 руб. 28 кап.);
- бутэлька каньяку за 14 руб. 97 кап.;
- бутэлька гарэлкі і пачак чыпсаў на 10 руб. 10 кап.
У выніку начальніка-карупцыянера асудзілі да 4 гадоў пазбаўлення волі ў калоніі ўзмоцненага рэжыму і штрафу на 400 базавых велічынь.