«Pa prośbach hramadskaści» chočuć źmienšyć patrabavańni da zdaroŭja vajskoŭcaŭ
Ministerstva abarony sumiesna ź Ministerstvam achovy zdaroŭja ciapier pracujuć nad karekciroŭkaj patrabavańniaŭ da stanu zdaroŭja asob, jakija pastupajuć na vajskovuju słužbu, paviedamiła pres-słužba Minabarony. Heta budzie datyčyć i sałdat terminovaj słužby, i kantraktnikaŭ, i reziervistaŭ.
20.01.2023 / 17:43
Tłumačać hetuju mieru, jak zvyčajna viadziecca, prośbami hramadskaści. Maŭlaŭ, Ministerstva zavalenaje vialikaj kolkaściu zvarotaŭ hramadzian, jakija ličać, što patrabavańni da stanu zdaroŭja značna zavyšanyja i heta nie dazvalaje maładym ludziam realizoŭvać zapavietnuju maru stać vajskoŭcami.
Padpałkoŭnik miedycynskaj słužby Śviatłana Kašura narakaje, što pry ciapierašnim zakanadaŭstvie pastupić na kantraktnuju słužbu zaminaje «banalnaja płoskastupniovaść», «nievialikaja strata zroku» ci «nievialikaja lišniaja vaha». Pry hetym, maŭlaŭ, tyja ž maładyja ludzi atrymlivajuć pravy kiroŭcy i viaduć zdarovy ład žyćcia.
Taksama, jak jana śćviardžaje, jość zachvorvańni, ź jakimi było składana słužyć u daŭniejšym vojsku, a ciapier źjaviłasia novaja technika, kiravańnie jakoj nie vymahaje asablivaha zdaroŭja. Jak prykład pryvodzicca vajskovaja śpiecyjalnaść «apieratar drona».