Były kamandzir PVK «Vahnier» uciok z Rasii i prosić palityčny prytułak u Narviehii
Kamandzir PVK «Vahnier» Andrej Miadźviedzieŭ pakinuŭ Rasiju 12 studzienia i, apynuŭšysia ŭ Narviehii, zapytaŭ abaronu i palityčny prytułak. Pra heta paviedamlaje prajekt Gulagu.net.
15.01.2023 / 16:20
Były najmit pierasiok miažu Rasii z Narviehijaj kala pasiołka Nikiel Murmanskaj vobłaści.
Pad achovaj ź miascovaha aeraporta Miadźviedzieva dastavili ŭ Osła. Ciapier jon znachodzicca ŭ centry dla parušalnikaŭ mihracyjnaha zakanadaŭstva. Były kamandzir pahadziŭsia dać pakazańni na Jaŭhiena Pryhožyna.
Miadźviedzieŭ i jaho tavaryš źviartalisia ŭ Gulagu.net u śniežni 2022-ha — prasili dapamahčy paźbiehnuć pazasudovaj raspravy.
Miadźviedzieŭ pakinuŭ bajavyja pazicyi PVK «Vahnier» adrazu paśla zakančeńnia 4-miesiačnaha kantrakta, padpisanaha ŭ lipieni 2022 hoda.
Mužčyna byŭ kamandziram 1-ha addzialeńnia 4-ha ŭzvoda 7-ha šturmavoha atrada PVK «Vahnier». Pa jaho słovach, jon udzielničaŭ u bajach pad Bachmutam i byŭ kamandziram byłoha źniavolenaha Jaŭhiena Nužyna, jakoha zabili kuvałdaj paśla viartańnia z ukrainskaha pałonu.