Pierabiežčyk, jaki ŭciok z Paŭnočnaj Karei na svaim samalocie, dažyŭ da 90 hadoŭ
Kienet Chił Rou (sapraŭdnaje imia — No Hym Sok) byŭ paŭnočnakarejskim pierabiežčykam epochi Karejskaj vajny i staŭ pieršym, chto zdoleŭ uciačy z Paŭnočnaj Karei razam ź niepaškodžanym źniščalnikam MiH. Pra jaho śmierć paviedamiła vydańnie The New York Times sa spasyłkaj na jaho dačku. Vydańnie taksama vyrašyła raspavieści historyju znakamitaha piłota.
12.01.2023 / 13:16
21 vieraśnia 1953 hoda, praz paŭtara miesiaca paśla padpisańnia pieramirja ŭ Karejskaj vajnie, No Hym Sok, lejtenant VPS Paŭnočnaj Karei, adarvaŭsia ad svajho patrula z 16 samalotaŭ pobač sa stalicaj krainy Pchieńjanam, pralacieŭ niezaŭvažanym ŭ Paŭdniovuju Kareju na svaim savieckim źniščalniku MiH i pryziamliŭsia na vajskovym aeradromie, na jakim mieścilisia VPS ZŠA i letčyki z sajuznych krain.
21-hadovy piłot, vieteran zvyš 100 bajavych vyletaŭ, uciok ad kamunizmu i «padaryŭ» VPS ZŠA pieršy niepaškodžany saviecki MIH. Praz hod uciakač atrymaŭ novaje imia — Kienet Rou — i pačaŭ novaje žyćcio ŭ Amierycy jak student kaledža. Chłopiec, kali pryziamliŭsia na bazu sajuźnikaŭ, zusim nie viedaŭ anhielskaj movy, a vakoł jaho pačałasia mituśnia: nichto nie viedaŭ, što ź im rabić.
Pryziamleńnie Kieneta tady stała hałoŭnaj navinoj u ŚMI. «Čyrvony MiH pryziamliŭsia kala Sieuła i zdaŭsia sajuźnikam», — paviedamili tady New York Times u svaim čarhovym vypusku na pieršaj hałoŭnaj staroncy.
«Ja adšpiliŭ kisłarodnuju masku i ŭpieršyniu ŭ žyćci ŭdychnuŭ volnaje pavietra», — uzhadvaŭ No Hym Sok u svaich miemuarach «MiH-15 da svabody» (1996). Tady, pa ŭspaminach, jon pryparkavaŭsia siarod amierykanskich vajennych samalotaŭ, sarvaŭ z prybornaj paneli fatahrafiju Kim Ir Siena (tahačasnaha lidara Paŭnočnaj Karei) u ramcy, vyskačyŭ z kabiny i kinuŭ fatahrafiju na ziamlu. Dziasiatki lotčykaŭ kinulisia da jaho, a kamandujučy piataj pavietranaj armijaj hienierał-lejtenant Semiuel Andersan paśpiašaŭsia na bazu.
21 vieraśnia 1953 hoda, No Hym Sok ŭ svaim MiH-15bis (udaskanalenaja viersija aryhinalnaha MiH-15) na avijabazie Kimpcho praź piać chvilin paśla svajho pryziamleńnia. Fota: U.S. Air Force photo
Kienet Chił Rou naradziŭsia 10 studzienia 1932 hoda ŭ miastečku z nasielnictvam 10 000 čałaviek na poŭnačy akupavanaha Japonijaj Karejskaha paŭvostrava. Jaho baćka byŭ administrataram japonskaha pramysłovaha kanhłamieratu ŭ Karei, a jaho maci była zvyčajnaj chatniaj haspadyniaj. U 1949 hodzie Kienet staŭ kursantam vajenna-marskoha vučylišča. Paźniej, u 19 hadoŭ, jon byŭ pieraviedzieny ŭ VPS i prajšoŭ kurs padrychtoŭki na reaktyŭnych źniščalnikach u savieckich lotčykaŭ u Mańčžuryi.
Zatym No Hym Sok uvajšoŭ u Kamunistyčnuju partyju Paŭnočnaj Karei i, pavodle jaho słoŭ, «prykidvaŭsia fanatykam kamunizmu» padčas Karejskaj vajny. U toj ža čas jaho baćka-antykamunist i maci-katalička mocna paŭpłyvali na toje, kab ich syn imknuŭsia da žyćcia va ŭmovach demakratyi. Jašče z momantu zakančeńnia Druhoj suśvietnaj vajny i źjaŭleńnia kamunistyčnaha režymu Kim Ir Siena na poŭnačy Karei No Hym Sok dumaŭ ab tym, jak dabracca da Amieryki.
Praz vosiem tydniaŭ paśla pieramirja ŭ Karei jon addzialiŭsia ad svajho patrula, padniaŭsia na vyšyniu 7000 m i paviarnuŭ na poŭdzień dla 13-chvilinnaha palotu praz demilitaryzavanuju zonu da horada Kimpcho.
Jamu pašancavała: amierykanski supraćpavietrany radar na poŭnač ad avijabazy Kimpcho byŭ adklučany na płanavaje techničnaje absłuhoŭvańnie, i ni amierykanskija samaloty ŭ pavietry, ni zienitčyki na ziamli jaho nie zaŭvažyli.
Taki ŭčynak No Hym Soka moža tłumačycca tym, što ŭžo na poźnich etapach Karejskaj vajny VPS ZŠA skinuli nad Paŭnočnaj Karejaj ulotki z prapanovaj uznaharody ŭ 100 000 dalaraŭ pieršamu paŭnočnakarejskamu piłotu, jaki deziertuje ź niepaškodžanym MiHam. Ale No Hym Sok u svaich miemuarach śćviardžaŭ, što ničoha nie viedaŭ pra hetu ŭznaharodu, i kazaŭ, što prosta chacieŭ žyć svabodnym žyćciom.
Kienet Rou pryjechaŭ u Złučanyja Štaty ŭ traŭni 1954 hoda i adrazu staŭ znakamitaściu. Jon byŭ pradstaŭleny Ryčardu Niksanu (jašče na toj momant vice-prezidentu ZŠA), u jaho braŭ intervju Dejv Haraŭej u prahramie «Siońnia» na kanale NBC, jon udzielničaŭ u radyjopieradačach «Hołasu Amieryki». Taksama Kienet atrymaŭ dypłom inžyniera va Univiersitecie Dełavera i pracavaŭ inžynieram u bujnych abaronnych i aerakaśmičnych kampanijach. Paźniej jon staŭ prafiesaram inžynieryi ŭ Avijacyjnym univiersitecie Embry-Rydła ŭ Dejtana-Bič. Kienet Rou pamior va ŭzroście 90 hod 26 śniežnia u Fłarydzie. Pra jaho śmierć paviedamiła jahonaja dačka Boni Rou.
Kali Kienet Rou pryjechaŭ u ZŠA, jaho samalot MiH-15bis taksama pryvieźli dla dadatkovych lotnych vyprabavańniaŭ amierykanskich VPS. Praź siem dziesiacihoddziaŭ hety samalot usio jašče isnuje i znachodzicca ŭ Nacyjanalnym muziei VPS ZŠA niedaloka ad Dejtana, štat Fłaryda. Čyrvonaja zorka na źniščalniku była pierafarbavana, a sam jon byŭ vystaŭleny razam z amierykanskim źniščalnikam F-86 Sabre u jakaści pamiaci pra bai padčas Karejskaj vajny na častcy karejskaj pavietranaj prastory, viadomaj jak «Aleja MiHaŭ» (miesca, dzie ŭpieršyniu adzin suprać adnaho vajavali amierykanskija i savieckija źniščalniki).