Год толькі пачаўся, а ўжо ўтапіліся пяць чалавек
Міністэрства надзвычайных сітуацый прыводзіць сумную статыстыку: хоць сёння яшчэ толькі 6 студзеня, ужо пяць чалавек з пачатку года ў Беларусі ўтапіліся. Прычына заўсёды адна — няправільныя паводзіны на лёдзе, які ва ўмовах адлігі вельмі нетрывалы.
06.01.2023 / 18:46
Фота ілюстрацыйнае
МНС у сувязі з гэтым нагадвае асноўныя прынцыпы бяспекі:
- бяспечным для чалавека лічыцца лёд таўшчынёй не менш за 7 см;
- трываласць лёду аслабленая ў вусцях і прытоках рэк, месцах хуткага цячэння, крыніц, сцёкавых вод, раёнах росту воднай расліннасці, дрэў, кустоў і чароту;
- пры тэмпературы вышэйшай за 0 ºС больш за тры дні трываласць лёду змяншаецца на 25%;
- трываласць лёду можна вызначыць візуальна: лёд блакітнага колеру — моцны, трываласць белага ў 2 разы меншая, шэры, матава-белы або з жаўтлявым адценнем — ненадзейны;
- трэба абавязкова апранаць выратавальную камізэльку.