Pryniali zakon, jaki dazvalaje zabirać majomaść
Na Nacyjanalnym pravavym internet-partale apublikavany zakon №240-3 ad 3 studzienia «Ab kanfiskacyi majomaści». Jon byŭ pryniaty Nacyjanalnym schodam 21 śniežnia. Zaraz u Biełarusi buduć kanfiskoŭvać majomaść za niedružalubnyja dziejańni suprać krainy.
06.01.2023 / 09:02
«Padstavaj dla kanfiskacyi abjektaŭ prava ŭłasnaści źjaŭlajecca ździajśnieńnie ŭ dačynieńni da Respubliki Biełaruś, jaje jurydyčnych i (abo) fizičnych asob niedružalubnych dziejańniaŭ», — havorycca ŭ zakonie.
Što majecca na ŭvazie pad «niedružalubnymi dziejańniami», u zakonie nie raskryvajecca.
Rašeńnie ab kanfiskacyi abjektaŭ prava ŭłasnaści (heta mohuć być hrošy, kaštoŭnyja papiery, rečy) prymaje Saviet Ministraŭ Respubliki Biełaruś. Paśla Dziaržkammajomaść pavinien budzie źviarnucca ŭ Ekanamičny sud Minska z zajavaj ab kanfiskacyi.
U joj pavinny być pieraličanyja abjekty, prapanavanyja da kanfiskacyi, subjekt, jakomu pavinny pieradać prava ŭłasnaści, miery (u tym liku nakładańnie aryštu na hrašovyja srodki na rachunkach, va ŭkładach (depazitach), prypynieńnie apieracyj pa rachunkach u bankach, niabankaŭskich kredytna-finansavych arhanizacyjach i inšaje).
Sud pavinien razhledzieć spravu na praciahu miesiaca z dnia zaviadzieńnia.
Kanfiskavanyja abjekty prava ŭłasnaści pavinny pierajści va ŭłasnaść Respubliki Biełaruś, a hrašovyja srodki — pieraličvacca ŭ respublikanski biudžet.
Zakon nabyvaje moc 16 studzienia. Na realizacyju jaho pałažeńniaŭ Savietu Ministraŭ dajecca 6 miesiacaŭ.