U Minsku žančyna-paradzicha adkryła aryhinalny sposab aniestezii
Dziaržaŭnyja prapahandysty pampiezna apisali praces naradžeńnia ŭ Minsku pieršaha niemaŭlaci 2023 hoda. Pavodle ahienctva «Minsk-Naviny», naradziłasia jano ŭ 00.01 1 studzienia, a adbyvałasia heta prosta-taki pavodle paŭnočnakarejskich uzoraŭ.
03.01.2023 / 18:13
Prapahandysty ciapier namahajucca stvarać kult asoby Łukašenki, i cytavany ŭ materyjale raskaz maci cudoŭna ŭ hetuju tendencyju ŭpisvajecca.
Maci niemaŭlaci Valeryi zavuć Jułija Maciušeŭskaja, heta ŭ jaje druhoje dzicia. A raskazała žančyna, kali vieryć prapahandystam, nastupnaje:
«My pastupili ŭ RNPC «Maci i dzicia» 29 śniežnia, prachodzili abśledavańnie. I papiarednie nam było pryznačana płanavaje kiesarava siačeńnie 4 studzienia. Ale ja źjeła viečaram łyžku aliŭje i mandarynku — i dačuška, mabyć, vyrašyła, što ŭsio ž para śviatkavać.
Ja pieražyvała, ale mianie supakojvali lekary. U momant rodaŭ prasiła svajho aniestezijołaha, kab jana ŭklučyła žyvuju tranślacyju navahodniaha vystupu našaha prezidenta. Potym pačuła boj kurantaŭ, pieršyja siekundy himna — i kryk majho dziciaci!»
Niadziŭna, što paradzichu z takim bekhraŭndam pryjechała vinšavać u balnicu sama pres-sakratarka Łukašenki Natalla Ejsmant.