Сабака «перакуліў» смеццявоз у Мінску
Здарэнне адбылося каля 16:09 на Партызанскім праспекце, паведамляе ДАІ горада.
31.12.2022 / 19:14
Кіроўца смеццявоза МАЗ рухаўся ў чацвёртай паласе ў напрамку МКАДа і не вытрымаў дыстанцыю з Volkswagen. Калі легкавік спыніўся, смеццявоз урэзаўся ў яго, пасля чаго перакуліўся на раздзяляльную паласу з металічнай агароджай.
У выніку аварыі пацярпеў кіроўца смеццявоза. Ён быў дастаўлены ў бальніцу.
Паводле папярэдняй інфармацыі, аварыя адбылася з-за сабакі, які выскачыў на праезную частку. Кіроўца «Фальксвагена» спыніўся, каб пазбегнуць наезду на сабаку. Жывёла не пацярпела.