Pryhožyn nazvaŭ prahnozy Miadźviedzieva «eratyčnymi fantazijami»
Vydańnie «RIA Tvoi novosti» źviarnułasia da ŭładalnika PVK «Vahnier» Jaŭhiena Pryhožyna, kab jon prakamientavaŭ prahnoz na nastupny hod, dadzieny byłym prezidentam Rasii, a ciapier namieśnikam staršyni Rady Biaśpieki Rasii Dźmitryjem Miadźviedzievym.
28.12.2022 / 18:37
Miadźviedzieŭ, čyja rytoryka stała vielmi rezkaj i hrubaj padčas vajny, 26 śniežnia stvaryŭ ceły tred pradkazańniaŭ: nafta pa 150 dalaraŭ, haz za 5 tysiač dalaraŭ za kubamietr, raspad Jeŭrasajuza, hramadzianskaja vajna ŭ ZŠA i h. d. Jašče adna fantazija zaklučałasia ŭ tym, što Polšča i Vienhryja akupujuć zachodnija vobłaści «byłoj Ukrainy».
Pryhožyn prakamientavaŭ heta tak:
«Tak, ja aznajomiŭsia z «prahnozami» i nie mahu nijak prakamientavać eratyčnyja fantazii. Viadoma, lubaja fantazija maje miesca. Ale mnie zdajecca, što braty Struhackija ŭ hetym lepš za mianie raźbirajucca».
Słoŭnyja praktykavańni Pryhožyna varta razhladać u kantekście tych unutranych pracesaŭ, jakija adbyvajucca ŭsiaredzinie rasijskich uładnych elitaŭ na fonie vajennaj kampanii va Ukrainie. Kiraŭniki militarysckich farmavańniaŭ z ćmianym statusam nakštałt Jaŭhiena Pryhožyna i Ramzana Kadyrava na fonie parazaŭ u vajnie pačali ŭsio bolš rašuča krytykavać kramloŭskija elity, čas ad času dapuskajučy vielmi dziorzkija vykazvańni navat adnosna samych nabližanych da Pucina asob.