Pad achovu ŭziali bałota, jakoje znachodzicca ŭ miežach Minska
Pa rašeńni Minskaha harvykankama administracyi Maskoŭskaha rajona pieradadziena pad achovu bałota ŭ paŭdniovaj častcy Minska. Učastak ujaŭlaje saboj typovy bijatop, tam rastuć redkija raśliny, paviedamlaje Minski haradski kamitet pryrodnych resursaŭ i achovy navakolnaha asiaroddzia.
27.12.2022 / 18:05
Bałota znachodzicca la pierasiačeńnia MKADa i trasy na Brest — u adnym z «pialostkaŭ» darožnaj raźviazki. Heta kruhły ŭčastak płoščaj 1,28 hiektara.
Uziać pad achovu terytoryju vyrašyli tamu, što jana ujaŭlaje saboj typovy bijatop pierachodnaha bałota. Typovy bijatop — heta ŭčastak z adnarodnymi ekałahičnymi ŭmovami, dzie žyvuć peŭnyja vidy žyvioł i raślin, jaki adlustroŭvaje charakternyja asablivaści pryrody Biełarusi. U hetym vypadku typovym bijatopam pryznana pierachodnaje bałota.
Na minskim bałocie ŭsiaredzinie maleńkaha «pialostka» MKADa rastuć redkija i źnikajučyja vidy raślin, jakija achoŭvajucca nie tolki ŭ Biełarusi, ale i ŭ Jeŭropie, dy i naohuł u śviecie. Dźvie z hetych raślin — viarba čarničnaja i ładdzian trochnadrezany — uklučanyja ŭ Čyrvonuju knihu Biełarusi.
«Tamu hety pryrodny kompleks unikalny dla bijałahičnaj raznastajnaści nie tolki horada Minska, ale i krainy ŭ cełym. Jaho achova dazvolić zachavać miescy vyrastańnia redkich i źnikajučych vidaŭ raślin, što dazvolić źbierahčy pryrodnaje bahaccie», — adznačyli ŭ Kamitecie pryrodnych resursaŭ.
Na ŭčastku, uziatym pad achovu, budzie abmiežavanaja lubaja dziejnaść, jakaja parušaje pryrodnuju raŭnavahu. Nielha pravodzić raboty, źviazanyja sa źmianieńniem reljefu i isnujučaha hidrałahičnaha režymu, skidać tudy ściokavyja, drenažnyja, karjernyja vody, paškodžvać raślinnaść, travianoje pokryva, uładkoŭvać miescy adpačynku, stavić pałatki, vykarystoŭvać miechaničny transpart.