Літва ўзмацняе кантроль за ўвозам драўніны з Беларусі
Літва ўзмацняе кантроль за ўвозам у краіну дзелавой драўніны, якая паступае з Беларусі і Расіі, паведаміла прэс-служба літоўскай мытні. Ведамства адзначае, што гэта выклікана частымі спробамі абысці еўрапейскія санкцыі.
27.12.2022 / 16:43
Фота: lrmuitine.lt
Ад гэтага часу дакументы і маршруты перавозкі драўніны будуць правярацца больш старанна. Перавозчыкі павінны будуць давесці дакументальна, што ў Беларусі і Расіі «тавар не перапрадаваўся, не перапрацоўваўся, не захоўваўся, не перагружаўся ў іншы транспартны сродак або прычэп з таварам не быў перададзены (замененая фура)».
Акрамя таго, трэба будзе паказваць дакументы з пацвярджэннем паходжання тавараў, з інфармацыяй пра вытворцу і адрас яго вытворчасці.
У канцы лістапада ў СМІ з'явілася інфармацыя, што шэраг буйных мэблевых кампаній Еўрасаюза працягваюць закупляць сыравіну ў дрэваапрацоўчых прадпрыемстваў Беларусі. А ўжо ў снежні ў некалькіх выданнях выйшла расследаванне, з якога вынікала, што беларуская і расійская драўніна можа трапляць у ЕС пад выглядам казахстанскай або кыргызстанскай.