Чыгунка: З-за снегу спазнілася 50 цягнікоў, затрымкі бывалі да 5 гадзін

У апошнія суткі ўмовы надвор'я — мяцеліца, мокры снег, ледзяны дождж і парывісты вецер — сур'ёзна ўскладнілі працу Беларускай чыгункі: прыйшлося задзейнічаць цэлы парк спецтэхнікі і снегаўборачных машын для аварыйна-аднаўленчых работ, паведаміла прэс-служба Беларускай чыгункі.

12.12.2022 / 19:24

У БЧ расказалі, што непагадзь прывяла да абледзянення правадоў і падзення дрэў на чыгунку і яе інфраструктуру, на некаторых участках — агульнай працягласцю каля 140 км — адключылася электразабеспячэнне.

Са спазненнем прыбыло больш за 50 пасажырскіх цягнікоў, затрымка іх склала ад 15 хвілін да 5 гадзін. Былі цяжкасці і ў грузавых цягнікоў. Наступствы непагадзі на чыгунцы да канца яшчэ не ліквідаваныя.

Беларуская чыгунка прыносіць прабачэнні пасажырам за нязручнасці і просіць з разуменнем аднесціся да сітуацыі, якая склалася. Калі пасажыры хочуць вярнуць квіткі ці атрымаць кампенсацыю з-за спазнення цягнікоў, ім трэба звяртацца ў білетныя касы.

Nashaniva.com