Pradstaŭnik «Miemaryjała» ŭ nobieleŭskaj pramovie nazvaŭ vajnu suprać Ukrainy «var’jackaj, złačynnaj i zachopnickaj»
Pra rasijskuju impierskaść i biespakaranaść havaryŭ u svajoj nobieleŭskaj lekcyi Jan Račynski, pradstaŭnik rasijskaj pravaabarončaj arhanizacyi «Miemaryjał». Siońnia ŭ Osła ŭručyli Nobieleŭskuju premiju miru.
10.12.2022 / 17:23
Fota: Markus Schreiber / AP
«Adno z vidavočnych nastupstvaŭ sakralizacyi dziaržavy — adradžeńnie impierskich ambicyj… Inšy vynik — biespakaranaść nie tolki tych, chto prymaje złačynnyja palityčnyja rašeńni, ale i tych, chto ździajśniaie złačynstvy pry ich vykanańni. Biespakaranymi i navat nie rasśledavanymi zastajucca biassudnyja pakarańni, zabojstvy mirnych žycharoŭ, katavańni i maradziorstva. My bačyli heta ŭ vajennych dziejańniach u Čačenii, my bačym heta i siońnia na zachoplenaj terytoryi Ukrainy. Paśla bambiožak Hroznaha źniščeńnie Maryupala nie stała čymści pryncypova novym», — adznačyŭ Račynski.
«Baraćba … z banderaŭščynaj stała abhruntavańniem var’iackaj, złačynnaj i zachopnickaj vajny suprać Ukrainy. Adnoj z pieršych achviar hetaha var’iactva stała histaryčnaja pamiać u samoj Rasii», — skazaŭ pradstaŭnik «Miemaryjała».
Ën zajaviŭ, što pucinski režym «skarežyŭ» histaryčnuju pamiać rasijan, pamianiaŭ miescami paniaćci «fašyzm» i «antyfašyzm». Ciapier rasijskija mas-miedyja nazyvajuć antyfašyzmam uvarvańnie ŭ susiedniuju krainu, jakaja nie davała dla hetaha nijakich padstaŭ, anieksiju zachoplenych terytoryj, teror suprać mirnych žycharoŭ zachoplenych terytoryj», — skazaŭ pradstaŭnik «Miemaryjała».