МЗС адкрыла электронную кнігу памяці па Макею
Міністэрства замежных спраў паведаміла пра адкрыццё магчымасці дасылаць спачуванні па раптоўна памерламу ўчора яго шматгадоваму кіраўніку Уладзіміру Макею.
27.11.2022 / 14:15
Уладзімір Макей. Фота Крысціны Карміліцынай
Спачуванні прапануецца высылаць на адрас condolences@mfa.gov.by.
Пра нечаканую смерць 64-гадовага Уладзіміра Макея паведамілі ўчора. Яе прычынай, як мяркуецца, стаў інфаркт, хоць раптоўныя смерці чыноўнікаў такога ўзроўню і ў такіх палітычных абставінах, якія ёсць цяпер у Беларусі, не абыходзяцца без канспіралагічных падазрэнняў. Якія дадаткова ўмацоўваюцца на дзіва стрыманай рэакцыяй на смерць адной з ключавых постацей беларускай палітычнай сістэмы цягам апошніх паўтара дзясятка гадоў з боку дзяржаўных СМІ і прапагандыстаў.
Так, галоўнае прапагандысцкае выданне нават не змясціла інфармацыі пра смерць Макея сярод галоўных навін, іншыя СМІ таксама пісалі пра яе няшмат і агульнымі словамі.