Viber скарачае работнікаў ва ўсіх офісах. У Мінску таксама
Кіраўніцтва Viber на мінулым тыдні паведаміла супрацоўнікам пра скарачэнне штату. Пра гэта dev.by расказалі самі супрацоўнікі.
17.11.2022 / 08:13
Фота: Kyky.org
Паводле іх слоў, гаворка вядзецца пра звальненне 8 % штату, або 40+ чалавек, у розных лакацыях. У якасці прычын названыя пагаршэнне фінансавых паказчыкаў і сітуацыя ў рэгіёне.
Пад скарачэнне нібыта трапілі непрыярытэтныя напрамкі развіцця: частку супрацоўнікаў перавялі на іншыя напрамкі, частку звальняюць. Сярод апошніх як распрацоўшчыкі і тэсціроўшчыкі, так і менеджары, як маладыя спецыялісты, так і дасведчаныя.
Хтосьці з супрацоўнікаў падкрэсліў, што захады больш слушна назваць аптымізацыяй, бо адсотак скарачэння адносна невялікі і людзям прапаноўваюць шчодрыя кампенсацыі.
Rakuten Viber — міжнародная кампанія, якая ўваходзіць у склад Rakuten Inc. з цэнтрамі распрацоўкі ў Беларусі, Ізраілі, Грузіі (офіс у Тбілісі адкрылі ў 2022-м). Усяго 500+ супрацоўнікаў, з іх у Беларусі каля 140.