Брытанская разведка патлумачыла, чым выгадны Генічаск для Расіі пасля здачы Херсона
Ваенная разведка Міністэрства абароны Вялікабрытаніі ў сваёй штодзённай ранішняй зводцы ацэньвае як выгаднае з ваеннага пункту гледжання становішча новага цэнтра акупаванай часткі Херсонскай вобласці.
15.11.2022 / 10:57
Раней акупацыйныя ўлады абвясцілі пра часовы пераезд у Генічаск — горад на беразе Утлюкскага лімана ў Азоўскім моры прыкладна за 40 кіламетраў ад крымскага памежнага пункта Джанкой, адміністрацыйны цэнтр Генічаскага раёна Херсонскай вобласці. І хоць акупацыйныя ўлады абверглі заявы аб пераносе абласнога цэнтра ў Генічаск, дзейнічаць яны плануюць менавіта адтуль.
Расія, верагодна, таксама перадыслацыруе падраздзяленні ваеннага кіравання ў раён Кахоўкі, лічаць у брытанскай разведцы.
Выбар гэтага раёна ў якасці каманднага вузла паказвае на прыярытэты расійскіх вайскоўцаў, якія ўмацоўваюць сваю абарону на поўдні Украіны. У яго добрыя пазіцыі для каардынацыі дзеянняў супраць патэнцыйнага ўкраінскага наступу — як з боку Херсона, гэта значыць паўночнага захаду, так і з боку Мелітопаля на паўночным усходзе, які кантралюецца Расіяй, а таксама для атрымання падмацаванняў з Крыма.
Але перш за ўсё, Генічаск у цяперашні час знаходзіцца па-за дасяжнасцю ўкраінскіх артылерыйскіх сістэм, якія нанеслі вялікія страты расійскім палявым камандным пунктам у Херсонскай вобласці.