ISW: Варта чакаць актывізацыі баёў у Данецкай вобласці
Расійскія наступальныя аперацыі ў Данецкай вобласці будуць актывізавацца ў бліжэйшыя тыдні па меры прыбыцця дадатковых мабілізаваных вайскоўцаў разам з сіламі, выведзенымі з заходняй часткі Херсона, піша ў сваім чарговым аналітычным дакладзе Амерыканскі інстытут вывучэння вайны (ISW).
14.11.2022 / 08:57
Украінскія сілы ў гэтым раёне будуць у цяжкім становішчы, і Кіеву, хутчэй за ўсё, прыйдзецца адцягваць войскі для абароны.
Аднак расіяне наўрад ці дамогуцца значных поспехаў у аператыўным дачыненні, нягледзячы на намаганні, хоць цалкам верагодна, што з часам цаной велізарных страт яны змогуць захапіць Бахмут.
Расійскія мабілізаваныя паказалі сябе недастаткова падрыхтаванымі, яны дрэнна экіпіяваныя і вельмі неахвотна ўступаюць у бой.
Яны прыбываюць не арганізаванымі часткамі, а накіроўваюцца ў асноўным па адным або невялікімі падраздзяленнямі на замену ў часці, якія дзевяць месяцаў змагаюцца без адпачынку, якімі панесены вялікія страты ў жывой сіле і тэхніцы і самі ў значнай ступені дэмаралізаваныя, паведамляе амерыканскі Інстытут вывучэння вайны.