Viedamstva Makieja vystupiła ŭ abaronu čempijanatu śvietu pa futbole ŭ Katary
U biełaruskim MZS adreahavali na ŭsio bolš hučnyja zakliki niekatorych zachodnich aktyvistaŭ i palitykaŭ bajkatavać čempijanat śvietu pa futbole ŭ Katary, jaki maje pačacca praź niekalki tydniaŭ. Z admysłovaj zajavaj vystupiŭ pres-sakratar viedamstva Anatol Hłaz, pieradaje BiełTA.
09.11.2022 / 19:20
Fota: BiełTA
Pres-sakratar MZS adznačyŭ, što Katar staŭ pieršaj arabskaj krainaj, jakaja atrymała prava na praviadzieńnie čempijanatu śvietu pa futbole, i kraina vielmi va ŭsio heta materyjalna ŭkłałasia: «Jak kraina, jakaja nieadnarazova prymała bujnyja mižnarodnyja piaršynstvy, my vydatna viedajem, jakich namahańniaŭ, u tym liku finansavych, arhanizacyjnych i čałaviečych, heta patrabuje».
Hłaz pravioŭ i inšyja paraleli: maŭlaŭ, ź Biełaruśsiu taksama abychodziacca niespraviadliva, tamu jana i salidaryzujecca z Kataram: «Na žal, dla asobnych cyničnych funkcyjanieraŭ na Zachadzie sport užo daŭno staŭ adnym ź instrumientaŭ zadavalnieńnia svaich palityčnych ambicyj i dasiahnieńnia metaŭ. Biespadstaŭnaje adchileńnie ad udziełu ŭ spabornictvach spartśmienaŭ-paralimpijcaŭ kaža pra toje, što ŭ ich niama ničoha śviatoha. I jakoje prava jany majuć krytykavać?»
Pres-sakratar MZS adznačyŭ taksama, što biełaruski bok daviaraje zajavam kiraŭnictva Katara, jakoje ŭsio, maŭlaŭ, dastupna tłumačyć, i zajaviŭ, što «my taksama pavažajem prava kožnaj dziaržavy na svoj šlach raźvićcia, kulturu i identyčnaść».
Varta adznačyć, što ŭ režymu Łukašenki z Kataram i jaho kiraŭnictvam daŭnija suviazi. Katarskim šejcham siarod inšaha zdadzienyja ŭ doŭhaterminovuju arendu vialikija lasnyja masivy, jość šmat inšych kirunkaŭ supracoŭnictva, mnohija ź jakich — patajemnyja. Tamu zusim nie dziŭna, što padparadkavanaje režymu MZS robić takija zajavy pa spravach, jakija Biełarusi niepasredna nie nadta i datyčać: biełaruskaja zbornaja na mundyjal nie prabiłasia, a zaŭziataraŭ z našaj krainy ŭ Katar dabiarecca taksama jaŭna nie vielmi šmat.