Šykoŭnaj kvateraj pres-sakratara rasijskaha Minabarony aficyjna vałodajuć adrazu dźvie «Rasijskija Fiederacyi»
Rasijski resurs «Možiem ob'iasniť» zaŭvažyŭ, što Fiederalnaja słužba kadastra saramliva schavała źviestki pra 96-mietrovuju kvateru pres-sakratara rasijskaha Minabarony Ihara Kanašenkava, jakaja raźmiaščajecca ŭ elitnym maskoŭskim žyłym kompleksie «Smalenskaja zastava».
08.11.2022 / 00:07
Płošča kvatery całkam supadaje z toj, što była paznačanaja ŭ dekłaracyi pres-sakratara Minabarony — 95,6 kvadratnaha mietra. Sam Kanašenkaŭ paznačyŭ u dakumientach, što vałodaje kvateraj razam sa svaim dziciom — vidać, sumiesna z dačkoj Arynaj, jakaja zamaŭlała na hety adras ježu.
Adnak hetuju infarmacyju Rasrejestr staranna chavaje. U vypiscy, atrymanaj kanałam «Možiem ob'iasniť», proźviščy ŭładalnikaŭ zamienienyja słovami «Rasijskaja Fiederacyja», prytym hetych «Rasijskich Fiederacyj» navat dźvie: kvatera padzielenaja pamiž imi ŭ 2015 hodzie.
Miarkujučy pa cenach u ŽK «Smalenskaja zastava», kvatera Kanašenkavych moža kaštavać ad 70 da 90 młn rubloŭ, prytym što za hod da jaje pakupki ciapierašni pres-sakratar Minabarony zarabiŭ usiaho 4,1 młn rubloŭ.
Ihar Kanašenkaŭ staŭ pres-sakratarom Minabarony ŭ 2011 hodzie. Paśla ŭvarvańnia va Ukrainu jon pravodzić rehularnyja bryfinhi ab pośpiechach «śpiecapieracyi», i jaho rehularna łoviać na cyničnaj i nie nadta prychavanaj chłuśni.