Kudy źnikła Dar’ja Domračava?
U apošnija dva hady Dar’ja Domračava, najlepšaja bijatłanistka ŭ historyi Biełarusi, redka vykazvałasia pa rezanansnych temach. U lutym Domračava razam z mužam naviedali alimpijadu ŭ Piekinie, dzie vystupała kitajskaja bijatłonnaja zbornaja, jakuju jany treniravali. Čym ciapier zajmajecca spartśmienka, raspavioŭ jutub-kanał «ČiestnOK».
12.11.2022 / 15:54
Darja Domračava i Nadzieja Skardzina, krasavik 2022 hoda. Fota: skardinon / Instagram
22 sakavika eks-bijatłanistka i čatyrochrazovaja alimpijskaja čempijonka apublikavała ŭ instahramie post, pryśviečany padziejam va Ukrainie. Domračava vykazałasia ŭ im, što chvalujecca nakont vajny, ale ŭ asnoŭnym jaje tekst byŭ pryśviečany zabaronie ŭdziełu rasijskich i biełaruskich spartśmienaŭ u mižnarodnych turnirach šmat u jakich vidach sportu.
«Ja liču absalutna naiŭnym mierkavać, što adchileńnie biełaruskich i rasijskich spartśmienaŭ ad mižnarodnych spabornictvaŭ dapamoža rašeńniu vajennaha kanfliktu. Na moj pohlad, padobnyja miery tolki spryjaiuć raspalvańniu varožaści siarod ludziej. Pierš čym havaryć pra hłabalnaje, davajcie pačniom z siabie, sa svaich čałaviečych jakaściej i svajho atačeńnia», — napisała spartśmienka.
Adno z narviežskich miedyja źviarnułasia da muža Darji, vaśmirazovaha alimpijskaha čempijona pa bijatłonie Ule-Ejnara Bjorndalena, z pytańniem, jak jon stavicca da pazicyi žonki i jaje niepryniaćcia adchileńnia spartśmienaŭ. Ale jon vyrašyŭ pramaŭčać.
U kancy kastryčnika alimpijskaja čempijonka pa bijatłonie Nadzieja Skardzina apublikavała fota z Darjaj i padpisała: «Kali chočacca pasiadzieć z siabroŭkaj u kaviarni, papić kapučyna i pahavaryć, možna prajechać i 4 krainy na 4 ciahnikach». Trochi raniej, u krasaviku, byłyja bijatłanistki taksama bačylisia, mahčyma, taksama padčas adpačynku.
Letam Domračava i Bjorndalen byli ŭ Minsku, dzie zrabili fota z doktaram Paŭłam Drynieŭskim. Miedyk padpisaŭ jaho tak: «Maje nastaŭniki». Akramia sustrečy z Drynieŭskim, eks-bijatłanisty pravodzili čas na łyžarolernaj trasie ŭ Minsku, što znachodzicca la praśpiekta Pieramožcaŭ i Doma futboła, tam ich sustreła fanatka pary i bijatłanistka Viera Baradač.
7 vieraśnia ŭ internecie źjaviłasia fota Domračavaj na fonie Minsk-Areny ź Iłlom Davidovičam — chłopcam, jakomu Darja dapamahaje ŭ lačeńni raku.
Ciapier, śćviardžaje «ČiestnOK», Domračava z mužam znachodzicca ŭ Narviehii, dzie jany ŭdzielničali ŭ tur-maršy i zabiehu na haru ŭ rodnaj vioscy narviežca. Ule-Ejnar zaniaŭ tam treciaje miesca. Zaraz para moža znoŭ viarnucca ŭ Kitaj — jak kažuć narviežskija SMI, muž Darji moža stać asistentam kiraŭnikoŭ nacyjanalnaj bijatłonnaj fiederacyi.