Stohadovuju draŭlanuju kaplicu na kryčaŭskich mohiłkach pieratvaryli ŭ śmietnicu
Užo nie pieršy hod draŭlanaje zbudavańnie kultavaha pryznačeńnia vykarystoŭvajecca jak śmietnica. Ni miascovaja ŭłada, ni pravasłaŭnyja dziejačy Kryčava nie źviartajuć uvahu na kapličku, chacia raźmieščana jana jakraz na pravasłaŭnych mohiłkach. U toj ža čas dla Kryčava kaplička ŭjaŭlaje vialikuju kaštoŭnaść, bo draŭlanaj architektury pačatku XX stahoddzia ŭ horadzie amal nie zachavałasia, piša Mahiloŭ.Media.
30.10.2022 / 20:39
Kaplica, što była pabudavana na pačatku XX stahoddzia, znachodzicca ŭ staroj častcy Kryčava ŭ rajonie pad nazvaj Zabiałyšan. Pryčym raźmieščana jana napasredna na terytoryi Zabiałyšanskich mohiłach, viadomych jašče z XVII stahoddzia.
Kaplica ŭjaŭlaje saboj čatyrochvuholnuju biarvienčatuju kanstrukcyju z sasnovaha raśpiłavanaha dreva. U vierchniaj častcy čatyrochskatnaha dacha ŭmacavany draŭlany kryž. Niekali dach byŭ pakryty hontam (reštki jaho možna pabačyć znutry), a ciapier — prosta šyfieram. Jašče ź dziasiatak hod tamu ŭ kaplicy byli dźviery prostaj stalarskaj raboty, ale na siońnia jany vybityja.
Zaraz staraja kaplica zaniadbanaja, pa pryznačeńni nie vykarystoŭvajecca. Unutry nievialikaje pa płoščy pamiaškańnie zavalenaje budaŭničym śmiecciem, biarvieńniem, płastykavymi i šklanymi butelkami z-pad ałkaholnych napojaŭ.