Majstar ź siakieraj. U Breście adkryvajecca niezvyčajnaja narodnaja vystava
28 kastryčnika ŭ vystavačnaj zale DzUK «Brescki AHKC» (Brest, vuł. Savieckaja, 54) adkryjecca piersanalnaja vystava narodnaha majstra Biełarusi Ivana Suprunčyka. Jana nazyvajecca «Majstar. Tvorca. Palašuk» i pryśviečana 80-hoddziu z dnia naradžeńnia dyrektara centra draŭlanaj skulptury vioski Cierabličy Stolinskaha rajona, piša «Viečiernij Briest».
27.10.2022 / 18:00
Fota Siarhieja Moščyka
Usie svaje vydatnyja raboty Ivan Pilipavič stvaraje z dapamohaj siakiery. Zdajecca, hrubaha instrumienta dla mastactva. Ale, jak kaža jon sam, «siače» ŭsio žyćcio. Viaskoŭcy paznajuć siabie ŭ draŭlanych skulpturach… Maje šmat uznaharod, vystavy ładzilisia ŭ roznych krainach.
Na jubilejnaj vystavie buduć pakazany skulpturnyja kampazicyi, hrafičnyja i žyvapisnyja raboty tvoraŭ Ivana Suprunčyka. Usie jany adlustroŭvajuć staražytnyja abrady, narodnyja śviaty i tradycyi. Majstar vykanaŭ ich u drevie abo namalavaŭ.
Cikava, što zajmacca z farbami Ivan pačaŭ ź dzieviaci hadoŭ. Jaho nichto nie vučyŭ, u Cierabličach da 1956 hoda nie było navat elektryčnaści. Ale jon pieššu chadziŭ za 18 kiłamietraŭ u Davyd-Haradockuju biblijateku, kab pačytać knihi pra mastakoŭ i mastactva. Potym pracavaŭ mastakom-afarmicielem u kałhasie «Praŭda», malavaŭ transparanty, łozunhi. Skončyŭ Mahiloŭski biblijatečny technikum. U Cierablickaj sielskaj biblijatecy adpracavaŭ 36 hadoŭ… Vučyŭsia ŭ Zavočnym narodnym univiersitecie mastactvaŭ (Maskva) na fakultecie malunka i žyvapisu… Ale sapraŭdnym natchnieńniem i zachapleńniem zaŭsiody była i zastajecca tvorčaść.
Naviedać vystavu možna da 13 listapada.