ŚMI: Kab rabić bieśpiłotniki, rasijanie kraduć fotakamiery darožnaj palicyi ŭ Šviecyi
U Šviecyi pačaścilisia vypadki kradziažoŭ fotakamier darožnaj palicyi z aŭtamabilnych trasaŭ, paviedamlaje hazieta Aftonbladet. U toj ža čas Ministerstva abarony Ukrainy śćviardžaje, što vyjaviła kamiery padobnaj madeli ŭ źbitych rasijskich bieśpiłotnikach. Šviedski bok paćvierdziŭ, što jamu viadomaja hetaja infarmacyja, piša Radyjo Svaboda.
21.10.2022 / 22:55
Rasijski bieśpiłotnik «Arłan-10Je». Fota ilustracyjnaje
Pavodle zajavy šviedskaj palicyi, za apošnija miesiacy z aŭtadaroh krainy źnikła bolš za 100 pryboraŭ aŭtamatyčnaha kantrolu chutkaści. Jak udakładniła pradstaŭnica Šviedskaj transpartnaj administracyi Eva Łundbierh, niekatoryja ź ich potym znachodziać uskrytymi: ź ich vydalenyja mienavita fotakamiery, a astatnija častki aparatury — radary i pracesary — zastajucca niekranutymi.
Va Ukrainie było apublikavana videa z razborkaj rasijskaha bieśpiłotnika «Arłan», jaki raźbiŭsia. Latajučy aparat zrobleny šmat u čym samatužna. Na kadrach vidać, što ŭ robata ŭmantavanaja fatakamiera padobnaha typu.
Pres-sakratar šviedskaj palicyi biaśpieki Fredryk Chulthren-Frybierh zajaviŭ, što ŭ viedamstvie viedajuć pra suviaź pamiž kradziažami na šviedskich darohach i rasijskimi bieśpiłotnikami, ale padkreśliŭ, što nie maje prava vydavać padrabiaznaści raźviednickaj pracy.