«Усім прывітусікі». Кіроўца тралейбуса з Мінска вядзе нястрымны TikTok
TikTok не толькі дае раскрыцца маладым людзям, але і дапамагае трансляваць свой боль мінскай кіроўцы тралейбуса Іне. Яна посціць кароткія відэа, дзе вучыць людзей правільным паводзінам у грамадскім транспарце і смяецца з паўсядзённасці — ролікі збіраюць нямала праглядаў. Праўда, нядаўна яе за гэта выклікалі да начальства
15.10.2022 / 19:58
У адным са сваіх «прафесійных» відэа жанчына паказвае, што не трэба грукаць у акенца кіроўцы, калі хочаце набыць талончык. Яна адзначае, што кіроўца бачыць пасажыраў і прадасць квіток падчас прыпынку.
Таксама Іна расказвае, як правільна стаяць у грамадскім транспарце, што не трэба трымаць дзверы тралейбуса для іншых пасажыраў і як быць, калі ты заснуў у транспарце і праехаў свой прыпынак.
Некаторыя павучальныя ролікі беларускі набіраюць сотні тысяч праглядаў. Напрыклад, гэты.
З пачуццём гумару ў мінчанкі таксама няблага. Яна выкарыстоўвае розныя вясёлыя маскі і здымае з імі відэа ў тралейбусе.
Таксама жанчына ў сваім акаўнце расказвае пра ўмовы працы і зарплаты кіроўцаў («На жыццё хапае», — запэўнівае). Але ж на відэа пару дзён таму Іна прызналася, што апошнія яе публікацыі выклікалі скаргі, і яе выклікала начальства.
«На жаль, больш відосікаў цікавых-прышпільных з нагоды працы не будзе. Мяне выклікала кіраўніцтва, я атрымала прачуханкі з-за шматлікіх скаргаў, якія сёння былі», — адзначыла яна.
Але працягвае радаваць падпісчыкаў.
На акаўнт кіроўцы Іны ў TikTok падпісана больш як 4,5 тысячы карыстальнікаў. Увогуле, пасля прагляду профілю складваецца ўражанне, што Іна вельмі любіць сваю прафесію і тралейбус.