УСУ паведамілі, што збілі чатыры расійскія авіяцыйныя ракеты
Аператыўнае камандаванне «Поўдзень» Узброеных сіл Украіны заявіла, што 27 верасня Расія нанесла з самалётаў некалькі ракетных удараў па трох абласцях краіны. Як сцвярджаюць украінскія вайскоўцы, ракеты былі збітыя.
28.09.2022 / 08:56
Паведамляецца, расійскі знішчальнік Су-35 выпусціў ракету Х-31 па пасёлку Беразнегаватае ў Мікалаеўскай вобласці, аднак яна была збітая ў паветры. Акрамя таго, камандаванне «Поўдзень» паведаміла, што па Адэскай вобласці выпусцілі дзве ракеты Х-59, іх таксама збілі.
Аналагічны ўдар быў нанесены па Крывым Розе ў Днепрапятроўскай вобласці, і ў гэтым выпадку ракета Х-59 была таксама знішчаная, сказана ў зводцы.