«Biełpošta» uviała kamisiju 15% za bujnyja pieravody z-za miažy
Kali atrymany mižnarodny pieravod pieravyšaje 4 tysiačy rubloŭ na miesiac, kamisija budzie składać 15% ad sumy, paviedamiła «Biełpošta».
19.09.2022 / 17:14
«Infarmujem, što RUP «Biełpošta» z 17.09.2022 uviedzienaja płata ŭ pamiery 15% ad sumy mižnarodnaha paštovaha hrašovaha pieravodu, jakaja pieravyšaje 4000 rub. za kalandarny miesiac:
- za vydaču i pieralik najaŭnych hrašovych srodkaŭ pry vypłacie ŭvachodnych mižnarodnych paštovych hrašovych pieravodaŭ u apieracyjnych kasach abjektaŭ paštovaj suviazi i doma;
- za dasyłku pa piśmovym rasparadžeńni atrymalnika mižnarodnych pieravodaŭ na biahučy (raźlikovy) bankaŭski rachunak», — havorycca ŭ aficyjnym paviedamleńni.
Raniej «Biełpošta» taksama stała brać płatu za pryjom płaciažoŭ i pieravodaŭ z kartak zamiežnych bankaŭ. Ale tam jana nie takaja vialikaja — 1,5%.