Лукашэнку на сустрэчу з Сі вымусілі надзець рэспіратар
Лукашэнка перад сустрэчай з Сі Цзіньпінам надзеў рэспіратар. Прытым той, які далі кітайцы, а не свой.
15.09.2022 / 16:31
Аляксандр Лукашэнка ад пачатку пандэміі кавіду адмаўляў небяспечнасць гэтай хваробы і тарпедаваў спробы беларускіх медыкаў увесці масачны рэжым.
Кавід у Беларусі забраў дзясяткі тысяч жыццяў. Па «лішняй смяротнасці» за 2020—2021 гады Беларусь мае адзін з найгоршых паказчыкаў у свеце.
Кавідная палітыка Кітая была зусім іншая — выключна строгая.
У выніку на сустрэчы з Сі Цзіньпінам Аляксандр Лукашэнка зрабіў тое, чаго ніколі не рабіў у Беларусі — надзеў рэспіратар. Ëн мусіў сябе пераламаць, каб на такое пайсці. Нават пры наведванні медыцынскіх устаноў ён на просьбу лекараў часам надзяваў маску, але рабіў гэта дэманстратыўна няправільна, чыста фармальна.
Прэс-служба Лукашэнкі паспрабавала жартаваць, «што Піневічу не ўдавалася, але Сі змог». Але па факце Аляксандр Лукашэнка мусіў прыняць чужыя правілы гульні.