Sajt i sacsietki Biełaruskaj Rady kultury pryznali «ekstremisckimi materyjałami»
Tak pastanaviŭ sud Partyzanskaha rajona Minska jašče 31 žniŭnia. U pačatku červienia Biełaruskuju Radu kultury, a taksama jaje sajt z usimi sacyjalnymi sietkami pryznali «ekstremisckim farmavańniem».
07.09.2022 / 22:19
Zasnavalnik i kiraŭnik Biełaruskaj Rady kulturySiarhiej Budkin nahadaŭ, što heta pieršaja kulturnickaja arhanizacyja, jakaja atrymała status «ekstremisckaha farmavańnia». Adnak ciapier inicyjatyva jašče z bolšym impetam budzie pracavać dla raźvićcia biełaruskaj kultury.
«Usio heta aznačaje, što ŭziaty nami kurs pravilny, jon całkam supiarečyć ciapierašniaj akupacyjnaj palitycy ŭ śfiery kultury, jakaja palahaje ŭ tatalnym kantroli, ideałahičnym absłuhoŭvańni, rusifikacyi i militaryzacyi na fonie štodzionnych represijaŭ… Sa svajho boku nadalej budziem kłapacicca pra biaśpieku našych ludziej, dapamahać tym, chto maje ŭ patrebu, spryjać u realizacyi kłasnych tvorčych idejaŭ», — skazaŭ Siarhiej Budkin.
Taksama ŭ telehram-kanale arhanizacyja paviedamiła, što rasceńvaje pryznańnie materyjałaŭ ekstremisckimi jak vydatnuju acenku dziejnaści ŭ infarmacyjnym kirunku
Ahułam «ekstremisckimi farmavańniami» ŭ Biełarusi pryznanyja ŭžo bolš za 80 abjadnańniaŭ, fondaŭ, telehram-kanałaŭ i miedyjaŭ.