Žychar Słonima zahinuŭ paśla kanfliktu z daišnikam. Zjaviłasia VIDEA zdareńnia
Kanflikt zdaryŭsia ŭ kancy žniŭnia i trapiŭ na kamieru. Padrabiaznaści paviedamlaje «Miedyjazona».
02.09.2022 / 16:38
Čytačy pieradali «Miedyjazonie» videa z kamiery nazirańnia, jakaja zafiksavała vuličny kanflikt u Słonimie, paśla jakoha, jak śćviardžajecca, zahinuŭ miascovy žychar Iłla Mašynski. Źviazaŭšysia z redakcyjaj, znajomy Mašynskaha kaža, što śmiarotny ŭdar jamu nanios supracoŭnik DAI.
Pa słovach surazmoŭcy «Miedyjazony»,
viečaram 27 žniŭnia 37-hadovy Mašynski padyšoŭ da traich mužčyn na stajancy kala kramy «Ałmi» na praśpiekcie Niezaležnaści. Adzin z mužčyn, jakoha znajomy Mašynskaha nazyvaje supracoŭnikam DAI, udaryŭ jaho. Paciarpieły ŭpaŭ, paśla čaho troje apanientaŭ zaciahnuli jaho ŭ mašynu.
Jak vynikaje z tajm-koda na videa z kamiery, u 23:15 mašyna z udzielnikami kanfliktu zjechała sa stajanki.
Sa słoŭ surazmoŭcy «Miedyjazony», Mašynski byŭ znajomy z čałaviekam, jaki ŭdaryŭ jaho. Jon dadaŭ, što ŭ Śledčym kamitecie raspačali kryminalnuju spravu pa fakcie zabojstva, ale pakul nie apytvajuć mahčymych śviedak.
«Miedyjazona» źviarnułasia pa kamientaryj va ŭpraŭleńnie SK Hrodzienskaj vobłaści, pradstaŭnica USK zapisała pytańnie i paprasiła pieratelefanavać, ale paźniej pierastała padymać słuchaŭku.
Pra toje, što ŭ Słonimie kala kramy «Ałmi» na praśpiekcie Niezaležnaści zahinuŭ miascovy žychar pa imieni Iłla, paviedamiła napiaredadni «Biełaruskaje Radyjo Racyja».