«Pakul kamisija nie daść zaklučeńnia, my ničoha…» Knihi Śviatłany Aleksijevič praviarajuć na ekstremizm
Čytačka z Drybinskaha rajona paviedamiła ŭ redakcyju vydańnia «Zierkało», što ź bibłijateki ŭ jaje ahraharadku čamuści zabirajuć knihi Śviatłany Aleksijevič. Žurnalisty pasprabavali razabracca ŭ situacyi — i daviedalisia pra niečakanyja detali.
26.08.2022 / 17:40
Fota: Deutsche Welle
Nie dabiŭšysia kankretyki ŭ samoj bibłijatecy i ŭ Drybinskim rajvykankamie, žurnalisty «Zierkała» dajšli da Ministerstva kultury. I tam va ŭpraŭleńni kultury i narodnaj tvorčaści ich «supakoili», što nijakaha zahadu zabirać knihi nobieleŭskaj łaŭreatki ź bibłijatek ź ich boku nibyta nie było.
Ale nie było tolki tamu, što knihi Aleksijevič pakul što tolki znachodziacca na… «respublikanskaj kamisii pa ekstremiźmie». I ŭ ministerstvie čakajuć jaje vierdyktu. «Pakul kamisija nie daść zaklučeńnia, my ničoha … ad Ministerstva kultury nijakaha zahadu nie było pa Aleksijevič, kab zabirać z fondaŭ».
Na pytańnie, jak možna padazravać u ekstremiźmie knihi nobieleŭskaj łaŭreatki, było adkazana, što kamisija raźbiarecca. I ŭ jaje nibyta «byvajuć stanoŭčyja rašeńni, byvajuć admoŭnyja».
Termin, ciaham jakoha kamisija maje vydać svoj vierdykt, u Ministerstvie nie nazvali. Zatoje skazali, što «jość kniha, jakuju kanfiskavali, jakaja pryznanaja ekstremisckaj. Jość peŭnaja kniha, jakuju vydała «Radyjo Svaboda», jana supiarečyć dziaržaŭnamu ładu biełaruskamu». Choć heta niapraŭda, pakul što nijakuju knihu Aleksijevič «ekstremisckaj» nie pryznavali.
Kamisija, pra jakuju skazali ŭ Ministerstvie, składajecca z 20 čałaviek. Jaje ŭznačalvaje deputat Pałaty pradstaŭnikoŭ, a ŭ minułym ministr infarmacyi Liłija Ananič. Akramia jaje, siarod členaŭ kamisii — namieśnik ministra infarmacyi Ihar Buzoŭski, namieśnik načalnika Hałoŭnaha ŭpraŭleńnia KDB Ihar Žukaŭ, načalnik adnaho z addziełaŭ HUBAZiK Juryj Tkačuk, a taksama aficyjny pradstaŭnik Śledčaha kamiteta Siarhiej Kabakovič, namieśnik načalnika addzieła ideałohii Dziaržaŭnaha mytnaha kamiteta Kaciaryna Škurdziuk i inšyja.