Płyvučy terminał dla pieravozki zvadkavanaha hazu idzie na padmohu Finlandyi i Estonii
Płyvučy terminał FSRU Exemplar abjomam u 150 900 kubamietraŭ nakiroŭvajecca ŭ Jeŭropu paśla taho, jak pabudavanaje ŭ 2010 hodzie sudna dla pieravozki zvadkavanaha pryrodnaha hazu (ZPH) zaviaršyła kantrakt na zimovuju pastaŭku ŭ Arhiencinie, piša vydańnie LGNPrime.
25.08.2022 / 19:45
Fota: Excelerate Energy
FSRU prybyła na arhiencinski terminał Bajia-Błanka ŭ mai, kab dastavić SPH na zimovy siezon 2022 hoda ŭ Arhiencinie. Ciapier jahonaja misija tam zavieršanaja i sudna kirujecca ŭ Jeŭropu, kab dapamahčy pieražyć zimu biez rasijskaha hazu krainam Jeŭrasajuza.
«Siońnia Exemplar adpraŭlajecca z Baji-Błanki i płyvie ŭ suchi dok u Ispanii dla techničnaha absłuhoŭvańnia, pierš čym adpłyć u Bałtyjskaje mora, kab akazać pasłuhi pa rehazifikacyi zvadkavanym pryrodnym hazam Finlandyi i Estonii», — havorycca ŭ paviedamleńni kampanii-ŭładalnika Excelerate Energy ŭ sacyjalnaj sietcy ŭ sieradu.
Da hetaha Finlandyja i Estonija damovilisia supolna zafrachtavać FSRU dla impartu ZPH, bo jeŭrapiejskija krainy imknucca pamienšyć zaležnaść ad pastavak rasijskaha hazu. Heta sudna moža pastaŭlać bolš za 5 młrd kubamietraŭ zvadkavanaha hazu ŭ hod.
U finskim porcie Inkaa na paŭdniovym uźbiarežžy Finlandyi, jaki davoli hłyboki dla hetaj mety i blizki da trubapravodaŭ, pa jakich haz pastupaje da kančatkovych spažyŭcoŭ u pramysłovym i inšych siektarach Finlandyi, Estonii i rehijonie Bałtyjskaha mora, užo pačalisia raboty pa budaŭnictvie partovych kanstrukcyj i hazapravoda. Pracu terminała płanujecca razharnuć užo da kanca 2022 hoda.