Hałoŭčanka prapanuje stvarać «Jeŭrazijski elektrobus». Ale heta moža być i parachod
Biełaruś vystupaje ź inicyjatyvaj piłotnaha prajekta dla pavieličeńnia doli apracoŭčaj pramysłovaści ŭ ekanomikach JeAES. Hetuju prapanovu vykazaŭ kiraŭnik urada Biełarusi Raman Hałoŭčanka na sustrečy z prezidentam Kyrhyzstana Sadyram Žaparavym.
25.08.2022 / 18:02
Raman Hałoŭčanka prylacieŭ u Biškiek
Siektar apracoŭčaj pramysłovaści, pa słovach biełaruskaha premjera, asabliva maje patrebu ŭ novych układańniach i realizacyi kankretnych prajektaŭ pramkaapieracyi na ŭzroŭni JeAES.
«Prapanujem realizavać piłotny prajekt «Jeŭrazijski elektrobus» u ramkach pramysłovaj kaapieracyi. Miarkujem, što JeEK hłyboka pahruzicca ŭ hetaje pytańnie.
Dapuścim, nie spadabajecca elektrobus, chaj budzie samalot, ciahnik, parachod. Usio, što zaŭhodna, što zjaŭlajecca vysokatechnałahičnym praduktam i zapatrabavanaje ekanomikami našych krain», — skazaŭ Raman Hałoŭčanka.
Jon vykazaŭ nadzieju na toje, što ad jaho inicyjatyvy budzie ŭ zachapleńni biznes usich piaci krain JeAES. Bo, maŭlaŭ, pierad ekanomikami krain rehijona — ahulnyja vykliki. Praŭda, pad zachodnimi sankcyjami pakul što z hetych piaci ekanomik tolki rasijskaja i biełaruskaja.