Жыхар Барысава абвінавачваецца ў забойстве выхавацелькі дзіцячага садка
23.09.2009 / 15:58
Пракуратура Мінскай вобласці завяршыла расследаванне і накіравала ў суд матэрыялы крымінальнай справы ў дачыненні да 45‑гадовага жыхара Барысава.
Ён абвінавачваецца ў забойстве сваёй 30‑гадовай знаёмай, выхавацелькі аднаго з дзіцячых садкоў горада.
Як паведамілі БелаПАН у пракуратуры вобласці, у лютым 2009 года маладая жанчына пайшла з дому і не вярнулася. Некаторы час яна лічылася зніклай без вестак. Аднак затым было ўстаноўлена, што ў сваім доме, на глебе асабістых непрыязных адносінаў, яе задушыў знаёмы, а труп схаваў.
Барысаўчаніну інкрымінуецца ўчыненне злачынства, прадугледжанага ч. 1 арт. 139 КК. Максімальнае пакаранне — да 15 гадоў пазбаўлення волі.
Справа будзе слухацца ў судзе Барысаўскага раёна.