Беларуская вайсковая дэлегацыя прымае ўдзел у «першым міжнародным антыфашысцкім кангрэсе» ў Падмаскоўі
Беларускія вайскоўцы прымаюць удзел у «першым міжнародным антыфашысцкім кангрэсе», які праходзіць у падмаскоўным парку «Патрыёт» у рамках Міжнароднага ваенна-тэхнічнага форуму «Армія-2022».
20.08.2022 / 19:57
Усе фота: Мінабароны РБ
Узначаліў беларускую дэлегацыю памочнік міністра абароны па ідэалагічнай працы ва Узброеных Сілах—начальнік Галоўнага ўпраўлення ідэалагічнай работы Міністэрства абароны Рэспублікі Беларусь генерал-маёр Леанід Касінскі.
Форум, паведамляе Мінабароны, накіраваны «на супрацьдзеянне фальсіфікацыі гісторыі і гераізацыі нацызму».
Мерапрыемства мае антыўкраінскую і антызаходнюю накіраванасць.
Кангрэс пачаў сваю працу з пленарнага паседжання, на якім выступіў Міністр абароны РФ Сяргей Шайгу. Ён прапанаваў удзельнікам форума абмеркаваць прычыны ўзнікнення неанацызму ў сучасным свеце і спосабы супрацьдзеяння яму.
Так, ён заявіў, што ідэя забароны ўсім расійскім грамадзянам уезду ў краіны Еўразвяза зʼяўляецца праявай нацысцкай палітыкі.
«У Эстоніі і Латвіі сталі традыцыйнымі маршы легіянераў СС, ваенным злачынцам усталёўваюцца помнікі і абеліскі. На вуліцах гарадоў Літвы адкрыта гучаць нацысцкія лозунгі і заклікі», — сказаў кіраўнік расійскага абароннага ведамства.