Byłomu hałoŭnamu redaktaru «Barysaŭskich navin» dali 15 sutak aryštu
Anatola Bukasa zatrymali ŭ Barysavie ŭ paniadziełak i abvinavacili ŭ stvareńni i raspaŭsiudžvańni ekstremisckich materyjałaŭ. Pra jakija kankretna materyjały idzie havorka, dahetul vyśvietlić nie ŭdałosia.
10.08.2022 / 14:52
Anatol Bukas. Fota «Radyjo Svaboda»
Paśla zatrymańnia doma ŭ Bukasa praviali pieratrus i zabrali techniku, paviedamlaje BAŽ.
10 žniŭnia nad redaktaram prajšoŭ sud u pamiaškańni Barysaŭskaha RAUS. Na razhlad spravy nie dapuścili navat žonku žurnalista, jakaja dva dni dziažuryła la budynka, kab daviedacca pra los svajho muža.
U vyniku Anatolu Bukasu dali 15 sutak aryštu.