Еўрапейскія дыпламаты заклікалі вызваліць беларускіх палітвязняў
Беларусь усё больш становіцца падобная на «расійскую ваенную зону». Пра гэта гаворыцца ў заяве Еўрапарламента, прысвечанай другой гадавіне прэзідэнцкіх выбараў 9 жніўня 2020 года ў Беларусі.
09.08.2022 / 14:02
«Балюча бачыць, што з тых часоў народ Беларусі падвяргаецца сістэматычным рэпрэсіям у іх горшых формах», — гаворыцца ў паведамленні.
У ім пазначана, што «рэжым душыць выказванне любых крытычных галасоў» у той час, як сам Лукашэнка «прадаў большую частку суверэнітэту сваёй краіны крамлёўскім спонсарам і «як следства, Беларусь усё больш становіцца падобная на «расійскую ваенную зону».
«Апошнія падзеі паказваюць, што барацьба супраць нелегітымнага, небяспечнага рэжыму Лукашэнкі — гэта не толькі ўнутраная справа беларусаў: гэта і наш клопат, паколькі гэта ўяўляе відавочную пагрозу для ўсяго нашага кантынента», — гаворыцца ў заяве.
Еўрапарламент заклікаў беларускія ўлады «неадкладна і безумоўна вызваліць і зняць усе абвінавачванні з усіх палітычных зняволеных і асоб, якія падвергліся адвольнаму затрыманню, і патрабуе неадкладнага спынення гвалту і рэпрэсій».
Еўрадэпутаты таксама заклікалі міжнародную супольнасць «праявіць цвёрдасць у ажыццяўленні санкцый супраць нелегітымнага рэжыму Лукашэнкі», бо мужны народ Беларусі з'яўляецца часткай еўрапейскай сям'і.