Paŭnočnaja Makiedonija pieradała Ukrainie čatyry samaloty Su-25, jakija sama raniej u jaje kupiła
Paŭnočnaja Makiedonija pieradała Ukrainie čatyry šturmavyja samaloty Su-25, jakija kupiła ŭ Kijeva padčas unutranaha kanfliktu z ałbanskaj mienšaściu ŭ 2001 hodzie. Pra heta paviedamlaje «Jeŭrapiejskaja praŭda» sa spasyłkaj na makiedonskuju presu.
04.08.2022 / 21:30
Samalot Su-25. Zdymak ilustracyjny. Fota: Vikipiedyja
Ministerstva abarony Paŭnočnaj Makiedonii na zapyt vydańnia nie paćvierdziła i nie abvierhła infarmacyju, adznačyŭšy, što rašeńnie ab nadańni Ukrainie ŭzbrajeńnia buduć «rassakrečanyja i pradstaŭleny ŭ paradku prazrystaści».
«Rašeńni, pryniatyja pa stanie na ciapier, nie ŭpłyvajuć na bajavuju hatoŭnaść našaj armii», — dadali ŭ viedamstvie.
Jak nahadvaje makiedonskaje vydańnie MKD, padčas kanfliktu ŭ Makiedonii ŭ 2001 hodzie kraina nabyła čatyry šturmaviki Su-25 va Ukrainy — try adnamiesnyja i adzin dvuchmiesny. Uviesnu 2003 hoda ich śpisali z Uzbrojenych siłaŭ z-za adsutnaści patreby, a ŭ 2004-m — padrychtavali dla prodažu. U 2011 hodzie Minabarony Makiedonii razhladała mahčymaść madernizacyi Su-25 pad standarty NATA, ale tak i nie ŭvasobiła hetyja płany ŭ žyćcio.
U červieni hetaha hoda paŭnočnamakiedonskaja Levaja partyja sa spasyłkaj na vajskovyja krynicy zajaviła, što Su-25 pačali ramantavać i praviarać dla pieradačy Ukrainie z udziełam ukrainskich inžynieraŭ.
Raniej stała viadoma, što Paŭnočnaja Makiedonija pieradaje Ukrainie savieckija tanki T-72, jakija płanavała zdymać z uzbrajeńnia ŭ najbližejšyja hady. Rašeńnie pieradać ich Ukrainie dadatkova arhumientavali tym, što jašče za niekalki hadoŭ hetaja technika stanie zusim sastarełaj i jaje ŭsio adno treba zamianiać na sučasnuju. Kolki tankaŭ pieradajuć Ukrainie, nie ŭdakładniajuć.